जनकपुरधाम ।  सरकारको स्वामित्वमा रहेको खाद्य व्यवस्था तथा व्यापार कम्पनी लिमिटेड प्रादेशिक कार्यालय जनकपुरधामले  पौष्टिक तत्व भएको (भिटामिनयुक्त) चामल उत्पादन शुरु गरेको छ । 

धान र चामलको खरिद–बिक्री गर्दै आएको कार्यालयले पौष्टिक तत्व भएको भिटामिनयुक्त चामल समेत उत्पादन गरेर वितरण शुरु गरेको कार्यालय प्रमुख गङ्गाप्रसाद साहले जानकारी दिनुभएको छ ।

विश्व खाद्य कार्यक्रमअन्तर्गत जनकपुरस्थित  कार्यालयको हाताभित्र फोटोफिकेसन प्लान्ट जडान भएको  छ तथा त्यस प्लान्टबाट  भिटामिनयुक्त चामल उत्पादन भइरहेको बताइएको छ । त्यहाँ चामलको गुणस्तर समेत जाँच गरिन्छ । २०८१ वैशाख महिनामा प्लान्ट जडान भएको हो । प्लान्ट जडान भएपछि यस कार्यालयबाट उत्पादन शुरु भएको सो पौष्टिक चामल कर्णाली प्रदेशमा वितरण गरिँदै आएको छ ।

पौष्टिक तत्व भएको चामल विश्व खाद्य सङ्गठनले भारतबाट किनेर त्यसलाई  प्लान्टमा पीठो बनाउने र प्रति एक सय किलो बोरा चामलमा एक किलो पीठो मिसाएर (पौष्टिकतत्व) भिटामिनयुक्त चामल उत्पादन गरी कर्णाली प्रदेशका कुपोषित जनतालाई वितरण गर्ने गरिएको प्रमुख साहले भन्नुभयो । 

विश्व खाद्य कार्यक्रमअन्तर्गत  प्लान्ट खाद्य संस्थानको सुर्खेत, जनकपुर तथा काठमाडौँ कार्यालयमा जडान गरिएको छ । भारतको रासन वितरणमा यो चामल अनिवार्य  त्यहाँको सरकारले गरेको छ ।

कार्यालयले अरुवा सोना मन्सुली तथा बासमती चामल सहुलियत तथा छुट मूल्यमा बिक्री शुरु गरेको कार्यालय प्रमुख साहले बताउनुभयो । अरुवा सोना मन्सुली चामल प्रतिकिलो ६५ रुपैयाँमा  पर्नेमा पाँच छुट गरेर प्रतिकिलो ६० र  बासमती चामल प्रतिकिलो  एक सय २३ रुपैयाँ पर्नेमा पाँच छुट गरेर प्रतिकिलो  एक सय १८ रुपैयाँ का दरले बिक्री भइरहको बताइएको छ । 

सहुलियत मूल्यमा बिक्रीका लागि  दुई सय क्विन्टल चामल  कार्यालयले कोटा निर्धारण गरेको छ । एकजनालाई ५० किलोसम्म  सहुलियतको चामल बिक्री वितरण गरिने प्रावधान छ ।