काठमाडौँ ।  प्रधानमन्त्री केपी शर्मा ओलीले शान्ति प्रक्रिया थालनी भएको १८ वर्षपछि सङ्क्रमणकालीन न्यायसम्बन्धी कानुनमा सहमति हुनु शान्तिका पक्षधरका लागि खुशीको विषय भएको बताउनुभएको छ । 

प्रधानमन्त्रीले आज प्रतिनिधिसभा बैठकमा समसामयिक विषयमा सम्बोधन गर्दै सहमतिका साथ कानुन पारित हुने चरणमा  पुगेकाले पारित भएका कानुनलाई कार्यान्वयन गर्न सरकारले यथेष्ट सहजीकरण गर्ने स्पष्ट गर्नुभएको हो । 

‘हाम्रो देशमा द्वन्द्व थियो । हामीले शान्ति प्रक्रिया अगाडि बढायौँ । यो प्रक्रिया हाम्रो आफ्नै हिषाबको मौलिक (होम ग्रोन) हो । कहिले धीमा गति र कहिले समाधान हुँदै यो प्रक्रिया अगाडि बढेको छ’  बैठकमा उहाँले भन्नुभयो– ‘हामीले दुनियाँका लागि एक नमुनाका रुपमा शान्ति प्रक्रिया अगाडि बढाएका छौँ । द्वन्द्वलाई मूल प्रवाहका साथै द्वन्द्वबाट अलगथलग भएका पक्षलाई उत्थान गर्ने गरी हामी अघि बढेका छौँ ।’

सत्य निरुपण तथा मेलमिलाप र बेपत्ता पारिएका व्यक्तिहरुको छानवि सम्बन्धी कानुन शान्ति सम्झौताको अन्तिम किस्ताको रुपमा रहेको उल्लेख गर्नुभयो । 

‘नेपालमा शान्ति प्रक्रियाको अन्तिम किस्ताका रुपमा सत्य निरुपण तथा मेलमिलाप र बेपत्ता पारिएकाहरुको छानविन सम्बन्धी कानुनलाई लिएका छौँ’ उहाँले भन्नुभयो – ‘राजनीतिक कार्यदल र संसदको सम्बन्धित समितिबाट पीडितकेन्द्रित हुने गरी सर्वसम्मत पारित भइसकेको छ । यस अर्थमा म खुशी व्यक्त गर्दछु । यो हाम्रो सफलता दुनियाँका लागि उपयोगी हुन सक्नेछन् ।’