ओखलढुङ्गा । ओखलढुङ्गामा गत आर्थिक वर्ष २०८० र ८१ मा ७९ करोड रुपैयाँ भन्दा बढी विकास बजेट ‘फ्रिज’ भएको छ । बजेट विकास निर्माणका लागि विनियोजन भए पनि समयमा काम सम्पन्न नहुँदा  ‘फ्रिज’  भएको हो ।

विकास बजेट ७९ करोड ३९ लाख ६२ हजार  सय ५५ दशमलव १६ पैसा ुफ्रिजु भएको कोष तथा लेखा नियन्त्रक कार्यालयका प्रमुख कोष नियन्त्रक मनोजकुमार जोशीले जानकारी दिनुभएको छ । उहाँका अनुसार जिल्लाका लागि प्रदेश तथा सङ्घीय सरकारले विनियोजन गरेको बजेटमध्ये खर्च हुन नसकेको  बजेट ‘फ्रिज’ भएको हो । 

‘समयमा काम सम्पन्न नहुँदा नियमानुसार भुक्तानी दिन सकिन्न । गत वर्ष जिल्लाको धेरै विकास बजेट फिर्ता भयो’ जोशीले भन्नुभयो– ‘प्रक्रिया पुगेर आएकालाई मात्रै भुक्तानी दिने गरेका छौँ । अन्य रकम नियमानुसार फिर्ता हुन्छ ।’ बजेट फिर्ता हुँदा विकास निर्माण प्रभावित हुने भएकाले समयमै काम गरेर भुक्तानी लिनुपर्ने उहाँको सुझाव छ । 

सङ्घ र प्रदेश दुवैतर्फ गत आवमा जिल्लाका लागि कूल ८ अर्ब ५४ करोड ५१ लाख ७६ हजार १ सय १५ बजेट विनियोजन भएको थियो ।  बजेटमध्ये सङ्घतर्फ ४ अर्ब ७८ करोड ७३ लाख ६६ हजार ३ सय १६ चालु र १ अर्ब १८ करोड १२ लाख ४७ हजार ५ सय ८१ रुपैयाँ पुँजीगत रहेको थियो ।

गत आवमा प्रदेशतर्फ चालु बजेट ६२ करोड ७२ लाख ५५ हजार र पुँजीगत १ अर्ब ५५ करोड ४८ लाख ८४ हजार रुपैयाँ बजेट जिल्लाका लागि विनियोजन भएको थियो । कोष तथा लेखा नियन्त्रक कार्यालयका अनुसार जिल्लाका स्थानीय तहलाई निकासा भएको बजेटमा पनि खर्च  वर्षेनी घटेको छ । 

तथ्याङ्कमा विकास बजेट खर्च नभएको देखिए पनि जिल्लाका दर्जनौँ आयोजना बजेट अभावका कारण रुग्ण बनेका छन् । राष्ट्रिय गौरवको योजनाका रुपमा रहेका लिखु करिडोर, मोलुङ करिडोर, दर्जनौँ सडक पुलसहितका पूर्वाधारका काम वर्षौंदेखि बजेट अभावमा अधुरा छन् ।