काठमाडौँ । पूर्वप्रधानमन्त्री तथा नेकपा एकीकृत समाजवादीका अध्यक्ष माधवकुमार नेपालले तारागाउँ विकास समितिको व्यवस्थापन ‘व्यवस्थापन अत्यन्तै खतम’ भएको टिप्पणी गर्नुभएको छ ।

पूर्वप्रधानमन्त्री नेपालले प्रतिनिधिसभा, अन्तर्राष्ट्रिय सम्बन्ध र पर्यटन समितिले तारा गाउँविकास समितिका सम्बन्धमा देखिएका समस्या एवं समाधान आइतबार आयोजना गरेको छलफलमा यस्तो टिप्पणी गर्नुभएको हो । छलफलमा पूर्वप्रधानमन्त्री नेपालले तारागाउँको नाममा विभिन्न जिल्लामा जग्गा र होटल/रेष्टुरेण्टहरु रहेको भन्दै तिनको राम्रोसँग सदुपयोग नभएको उल्लेख गर्नुभयो । 

पूर्वप्रधानमन्त्री नेपालले तारागाउँ विकास समितिबाट सन्चालित ककनीको रिसोर्टमा आफू पनि बसेको जानकारी दिँदै छलफलमा भन्नुभयो – ‘व्यवस्थापन अत्यन्तै खतम छ ।’
अध्यक्ष नेपालले छलफलमा समितिअन्तर्गत सञ्चालन भएका सम्पूर्ण होटल तथा रिसोर्टको यथास्थितिबारे जानकारी गराउन माग समेत गर्नुभयो । ‘तारागाउँ विकास समितिका सम्बन्धमा विगतदेखि नै ठूलो विवाद भइआएको छ’ उहाँले भन्नुभयो– ‘ सरकारले विवादको दीर्घकालीन समाधानसहित स्पष्ट दृष्टिकोण बनाउन आवश्यक छ । समिति र अख्तियारबीच त्यस सम्बन्धमा फरक धारणा भए पनि सरकारले टुङ्गोमा पुयाउनेगरी काम गर्नुपर्छ ।’

संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले तारागाउँ रिजेन्सी होटल लिमिटेडले गैरकानुनी ढङ्गले राज्यलाई क्षति पु¥याउने गरी काम गरेको देखिएको बताउनुभयो । उहाँले अख्तियार र मन्त्रालयबीचको तादम्यता नमिल्दा विगतका विभिन्न समितिले दिएका निर्देशन कार्यान्वयन गर्न समस्या भएको जानकारी गराउनुभयो ।
     
समितिका सदस्य नारायणप्रकाश साउदले समस्या समाधान हुने गरी काम अगाडि बढाउन सुझाव दिँदै समस्या समाधान गर्नेगरी कार्ययोजना ल्याउन आवश्यक रहेको बताउनुभयो । अर्का सदस्य भीमप्रसाद आचार्यले तारागाउँ विकास समितिका नाममा भएको जग्गा हड्प्ने कार्य भएको देखिएको उल्लेख गर्दै कार्ययोजना ल्याउनुपर्नेमा सहमति जनाउनुभयो ।

तारागाउँ विकास समितिका अध्यक्ष सुरेश जोशीले समस्या समाधान समिति एक्लैले गर्न नसक्ने उल्लेख गर्दै सरकारको साथ आवश्यक भएको बताउनुभयो ।
     
त्यस अवसरमा तारागाउँ रिजेन्सी होटल लिमिटेडमा तारागाउँ विकास समितिको शेयर संरचना, लगानी र प्रतिफल, विभिन्न समयमा गठित समितिका सुझावका विषयमा सांसदहरुले छलफल  गर्नुभएको थियो । अन्तर्राष्ट्रिय सम्बन्ध र पर्यटन समितिले तारा गाउँविकासका सम्बन्धमा देखिएका समस्या एवं समाधानका उपायसहितको कार्ययोजना यथाशीघ्र पेस गर्न सरकारलाई निर्देशन दिएको छ ।
    
समितिले तारा गाउँविकास समिति र तारागाउँ रिजेन्सी होटल लिमिटेडका सम्बन्धमा संस्कृति, पर्यटन तथा नागरिक उड्डयन मन्त्रालय र तारागाउँ विकास समितिसँग छलफलपछि  समितिका नाममा रहेको चलअचल सम्पत्तिको विवरण तथा सम्पत्तिको सञ्चालन तथा सदुपयोग हुनेगरी कार्ययोजना बनाई समितिमा पेश गर्न निर्देशन दिइएको हो ।
     
‘तारा गाउँविकास समिति र तारागाउँ रिजेन्सी होटलबीच भएको सम्झौतालाई समयानुकूल संशोधनमार्फत राज्यको हितमा हुनेगरी कार्यान्वयन गर्न कार्ययोजना बनाई समितिमा यथाशीघ्र पेश गर्न निर्देशन दिइएको छ’ समितिको निर्णयमा भनिएको छ ।