काठमाडौँ । नेपाल विद्युत् प्राधिकरणका कार्यकारी निर्देशक कूलमान घिसिङले आफ्नो कार्यकालमा प्राधिकरणमा भएको उपलब्धि सार्वजनिक गर्नुभएको छ । 

कार्यकारी निर्देशक घिसिङले शुक्रबार प्राधिकरणमा पत्रकार सम्मेलन  गरेर आफ्नो दोस्रो कार्यकालको तेस्रो वर्ष पूरा भएको अवसरमा प्राधिकरणले गरेका उपलब्धि सार्वजनिक गर्नुभएको हो । 

८ वर्ष अगाडि ३४ अर्ब ६१ करोड रुपैयाँ सञ्चित घाटामा रहेको प्राधिकरण अहिले ४७ अर्ब ४१ करोड रुपैयाँ सञ्चित नाफामा पुगेको उहाँले जानकारी दिनुभएको छ । गत आर्थिक वर्ष २०८०र८१ मा मात्र खुद नाफा १३ अर्ब ३१ करोड रुपैयाँ रहेको उहाँको भनाई छ ।   आव २०७३ र ७४ मा १ अर्ब ५० करोड रुपैयाँ खुद नाफा कमाएको प्राधिकरण त्यसयता निरन्तर नाफामा गएको हो । उहाँले यसबीचमा तीन पटक गरी २५ प्रतिशत विद्युत् महशुल घटाइएको भन्दै  प्राधिकरणले महसुल बढाएर नाफा नबढाएको समेत जानकारी दिुभएको छ । 

अहिले प्राधिकरणका ५९ लाख ग्राहक पुगेका छन् । यसमध्ये २२ लाख ग्राहकले न्यूनतम शुल्क ३० रुपैयाँ मात्र कायम गरी निःशुल्क विद्युत् उपलब्ध गराइएको उहाँले सम्मेलनमा सुनाउनुभयो ।  सिँचाइका लागि प्रतियुनिट २ रुपैयाँमा विद्युत् उपलब्ध गराइएको समेत कूलमानले उल्लेख गर्नुभयो । 

लिफ्टिङ खानेपानीमा डिमान्ड शुल्क नलाग्ने र इनर्जी शुल्कमा सहुलियत दिइएको समेत उहाँको भनाइ छ । कूलमानले विद्युतीय सवारीसाधनलाई प्रोत्साहन गर्न चार्जिङ स्टेसनमा सहुलियतपूर्ण महसुल दर कायम गरिएको बताउनुभयो ।