काठमाडौँ  । बुधबार दिउँसो नुवाकोटमा दुर्घटनामा परेको एयर डाइनेष्टीको ९ एन–एजेडी हेलिकप्टर  र त्यसलाई उडाएका क्याप्टेन यसअघि पनि  दुर्घटनामा परेको खुलेको छ । 

एयर डाइनेष्टीको ९ एन–एजेडी हेलिकप्टर  यसअघि २०७९ चैत २९ गतेमा  काठमाडौंको धुम्बाराहीस्थित ह्याम्स अस्पतालमा अवतरणका दुर्घटनामा परेको थियो ।  हेलिकप्टर त्यस बेला ह्याम्सबाट चिकित्सक लिएर बिरामी लिनका लागि भरतपुर जान लाग्दा दुर्घटना भएको हो । त्यो बेला भएको दुर्घटनामा मानवीय क्षति भएन तर हेलिकप्टरको टेल रोटर भने भाँचिएको थियो ।

यस्तै आज भएको दुर्घटनामा जीवन गुमाएका क्याप्टेन अरुण मल्ल यसअघि पनि हेलिकप्टर  दुर्घटनामा पर्नुभएको थियो । तर त्यसबेला उहाँ सकुशल रहन सफल हुनुभएको थियो । 

२०७० असोज १० गते काठमाडौँबाट सोलुखुम्बुको लागि उडेको एयर डायनेष्टीको ९ एन–एइएक्स ९ एएस–३५०० हेलिकोप्टर सोलुखुम्बुको लुक्ला विमानस्थलमा अवतरणको क्रममा दुर्घटनामा परेको थियो । त्यो हेलिकप्टर  त्यस बेला हेलिप्याडमा अवतरणको क्रममा पल्टिएर दुर्घटना भएको हो ।

त्यो दुर्घटनामा हेलिकप्टरमा सवार २ जना घाइते भएका थिए । त्यस बेला हेलिकप्टर  उडाएका क्याप्टेन मल्ल र अर्का यात्रु सोनाम छिरिङ सेर्पा भने सकुशल रहनु भएको थियो । । त्यो दुर्छटनामा सकुशल रहनु भएका क्याप्टेन मल्ल यस पटक भने जोगिनु भएन । 

बुधबार भएको दुर्घटना क्याप्टेन मल्लसहित हेलिकप्टर मा सवार पाँचै जनाको जीवन गुमेको छ । । दुर्घटनामा क्याप्टेन मल्लसहित चिनियाँ नागरिकहरु यी याद वु, जुदाड टाङ, जी ली र जेमिङ सीको मृत्यु भएको नागरिक उड्यन प्राधिकरणले जनाएको छ ।