काठमाडौँ । नेपाल कम्युनिष्ट पार्टी (एकीकृत समाजवादी)लाई केन्द्रीय सदस्य छान्न सकस भएको छ । केन्द्रीय सदस्य बन्नको लागि कसरत गरिरहेकाहरुका आकांक्षीहरुको संख्या पार्टी विधानले व्यवस्था गरे भन्दा पनि बढी भएपछि एकीकृत समाजवादीलाई टुंग्याउन मुश्किल परेको हो । 

एकीकृत समाजवादीको विधानमा ३३ प्रतिशत महिला र २० प्रतिशत युवासहित ३ सय २९ जना केन्द्रीय सदस्य बनाइने उल्लेख छ । एक महिना अघि सम्पन्न महाधिवेनले ९३ जना केन्द्रीय सदस्य, अध्यक्ष, सम्मानित नेता र महासचिव मात्रै घोषणा गरेको छ । विधानले व्यवस्था गरे अनुसार अब २ सय ६ जना केन्द्रीय सदस्य थप्नुपर्ने छ । केन्द्रीय सदस्य नटुंग्याउँदा एकीकृत समाजवादीले पोलिटब्यूरो, स्थायी समिति र केन्द्रीय पदाधिकारी समेत चयन गर्न सकिरहेको छैन । एकीकृत समाजवादीको केन्द्रीय पदाधिकारी १९ जनाको हुने बनाइएको छ । महाधिवेशनले अध्यक्षमा माधवकुमार नेपाल, सम्मानित नेतामा झलनाथ खनाल र महासचिवमा घनश्याम भूसाललाई दोहोर्याएको छ । उपाध्यक्ष, उमहासचिव र सचिव लगायत पद भने  छिनोफानो गर्न बाँकी छ । 

केन्द्रीय सदस्य टुंग्याउनेबारे एकीकृत समाजवादीमा बुधबार पनि छलफल भएको छ । पार्टी केन्द्रीय कार्यालय आलोकनगरमा  भएको बैठकमा समावेशिताको अनुपात र सङ्ख्याअन्तर्गत दलित, आदिवासी जनजाति र खुला समूह निर्धारण गरी केन्द्रीय कमिटीलाई पूर्णता दिनेबारे छलफल गरिएको हो ।  ।

बैठकले केन्द्रीय कमिटी र केन्द्रीय आयोगको संख्या, नाम र मनोनयबारे गृहकार्यका ३ सदस्यी कार्यदल गठन बनाएको छ । कार्यदलमा अध्यक्ष नेपाल, सम्मानित नेता  खनाल र महासचिव भूसाल रहनुभएको छ । 

कार्यदलको गृहकार्यपछि अर्को बैठक साउन १८ गते बस्ने एकीकृत समाजवादीले जनाएको छ । बैठकमा सहभागी नेताहरुका अनुसार अब बस्ने बैठकले केन्द्रीय कमिटी र केन्द्रीय आयोगको टुङ्गो लगाउने छ ।