पर्सा । अधिकांश सरकारी कार्यालयले खानेपानी महशुल नतिरेको पाइएको छ । 

नेपाल खानेपानी संस्थान शाखा कार्यालय वीरगञ्जको आर्थिक वर्ष २०८० र ८१ असार मसान्तसम्मको सरकारी कार्यालय तथा निजी ग्राहकको  खानेपानी महशुल बक्यौता १२ करोड ३३ लाख ५७ हजार ५ सय १८ रुपैयाँ पुगेको छ ।

सरकारी कार्यालय तथा निजी घरमा संस्थानको खानेपानी लाइन जोडे पनि नियमित रूपमा खानेपानीको महशुल भुक्तानी नगर्दा बक्यौता रकम वर्षेनी वृद्धि हुँदै आइरहेको छ । बक्यौता रकममध्ये सरकारी निकायले तिर्नुपर्ने बक्यौता रकम ३ करोड ९८ लाख ९७ हजार ७ सय ४८ रुपैयाँ रहेको छ ।  निजी घरमा खानेपानी प्रयोग गरेवापतको तिर्नुपर्ने बक्यौता रकम ८ करोड ३४ लाख ५९ हजार ६ सय ७० रुपैयाँ  बक्यौता कायमै छ ।

कार्यालयका प्रमुख मन्दिप श्रेष्ठले वर्षौँदेखि सरकारी तथा निजी घरमा खानेपानीको लाइन जोडेर नियमित खानेपानीको महशुल भुक्तानी नगर्दा बक्यौता रकम बढेको बताउनुभयो । ‘सरकारी तथा निजी घरले खानेपानी उपयोग गरे पनि बक्यौता सवा १२ करोडभन्दा बढी छ’ उहाँले भन्नुभयो– ‘निजीमात्र होइन, वीरगञ्जका ४५ भन्दा धेरै सरकारी निकायका खानेपानीको बक्यौता पनि ४ करोड रुपैयाँ हाराहारीमा छ ।’

कार्यालयका अनुसार नारायणी अस्पतालको मात्रै बक्यौता १ करोड ८४ लाख ७८ हजार ९सय ७० रुपैयाँ छ । वीरगञ्ज महानगरपालिका र त्यस मातहतका वडा कार्यालयको बक्यौता १ करोड रुपैयाँ भन्दा बढी छ ।  ठाकुरराम क्याम्पसको ४९ लाख ६१ हजार ४ सय १७ रुपैयाँ छ । 

जिल्ला प्रशासन कार्यालय पर्साको पनि बक्यौता ३५ लाख १० हजार ४ सय ४७ रुपैयाँ छ । कार्यालय प्रमुख श्रेष्ठले खानेपानीको बिलअनुसारको महशुल ३ महिनाभित्र भुक्तानी नगरेको खण्डमा ५० प्रतिशत जरिवाना लाग्ने प्रावधान रहेको बताउनुभयो । ‘खानेपानीको महशुल नतिर्ने निजी तथा सरकारी निकायलाई ताकेता गर्दै आइरहेका छौँ । तर अहिलेसम्म अपेक्षाकृत रूपमा बक्यौता रकम असुलउपर गर्न सकिरहेका छैनौँ ।’

कार्यालयका अनुसार आव २०८०र ८१ को असार मसान्तसम्मको अवधिमा यस कार्यालय मातहत ११ हजार १ सय ३९ घरपरिवारमा खानेपानी लाइन जडान भएको छ । कार्यालयले गत आवमा सानाठूला गरेर २१ किलोमिटर लम्बाइको पाइप लाइन विस्तार गरेको जनाएको छ ।