कास्की ।  पोखरामा आज भएको विद्यालयको बस दुर्घटनामा २ जनाको मृत्यु भएको छ । दुर्घटनामा २८ जना घाइते भएका छन् । 

पोखरा–१७ बिरौटास्थित एलपी देवकोटा मेमोरियल स्कुलको ग १ क ६२१९ नम्बरको विद्यार्थी बोकेको बस पोखरा–२१ गुड्कुस्थित भित्री सडकमा अनियन्त्रित हुँदा सडकबाट ५० मिटर तल खसेको हो ।  घटनामा पोखरा–२१ बस्ने  विद्यालयकी कार्यालय सहयोगी ३३ वर्षीया आरती विक र विद्यालयमा अध्ययनरत उनका छोरा ६ वर्षीय प्रिन्स विकको मृत्यु भएको छ ।  

आरती  र प्रिन्सको गण्डकी मेडिकल कलेजमा उपचारका क्रममा मृत्यु भएको  जिल्ला प्रहरी प्रवक्ता वसन्तकुमार शर्माले जानकारी दिनुभएको छ । 

दुर्घटनामा घाइते भएका विद्यार्थी, शिक्षक, अभिभावक तथा चालकमध्ये १३ जनाको गण्डकी मेडिकल कलेजमा, १२ जनाको पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पताल र तीन जनाको मणिपाल शिक्षण अस्पतालमा उपचार भइरहेको प्रहरीले जनाएको छ ।