बाँके । बाँकेको जमुनाह सीमा नाकाहुँदै भारतबाट गत वर्ष १ अर्ब ११ करोड, ६१ लाख रुपैयाँको आलु नेपाल भित्रिएको छ ।  आर्थिक वर्ष २०८०/८१ मा ४ करोड ४९ लाख ८४ हजार ६ सय ६९ किलो आलु भारतबाट आयात गरिएको हो । 

नेपालगञ्ज भन्सार कार्यालयका सूचना अधिकारी पूर्णप्रसाद लम्सालका अनुसार आर्थिक वर्ष २०७९/८० भन्दा गत आवमा  १८ करोडको आलु बढी आयात गरिएको हो । आर्थिक वर्ष २०७९/८० मा  ९३ करोड ६० लाख ६९ हजार बराबरको ३ करोड ७५ लाख ८५ हजार ८८ किलो आलु आयात गरिएको थियो । 

आलु आयातबाट आव २०७९/८० मा  १४ करोड ७७ लाख २२ हजार तथा गत आव २०८०/८१ मा  २७ करोड २२ लाख ४४ हजार रुपैयाँ राजस्व सङ्कलन भएको सूचना अधिकारी लम्सालले बताउनुभयो । अघिल्लो आवको तुलनामा गत आवमा  १३ करोड रुपैयाँ राजश्व वृद्धि भएको छ । 

पछिल्लो समय बाँके, बर्दिया, दाङ, सल्यान लगायतका जिल्लामा आलु उत्पादन उल्लेखनीय मात्रामा बढ्दै गए पनि भारतबाट आयात भने नघटेको कृषि ज्ञान केन्द्रका प्रमुख सकील अहमदले बताउनुभयो । उहाँका अनुसार आलु र प्याजमा आत्मनिर्भर बन्न सरकारले विभिन्न कार्यक्रम सञ्चालन गरिरहेको भए पनि आयातमा कमी आउन सकेको छैन ।