काठमाडौँ । केही दिनदेखि लगातार उकालो लागेको नेपाल स्टक एक्सचेञ्ज (नेप्से) परिसूचक आज भने दोहोरो अंकले घटेको छ । परिसूचक घटे पनि कारोबार रकम उच्च देखिएको छ ।

नेप्से परिसूचक बुधबार २७ दशमलव ३२ अंकले घटेर २ हजार ५ सय ३६ दशमलव ११ को विन्दुमा अडिएको छ । आज ३  सय ११ कम्पनीको ४ करोड ७ लाख ४७ हजार २ सय २६ कित्ता शेयर, एक लाख ८८ हजार ८ सय ६५ पटक खरिदबिक्री हुँदा १६ अर्ब २० करोड ८५ लाख ७७ हजार ३ सय १४ रुपैयाँ बराबरको कारोबार भएको छ ।

आजको कारोबारमा वित्त समूह एक दशमलव १६ र होटल तथा पर्यटन समूह शून्य दशमलव १३ प्रतिशतले बढेको छ ।  अरु सबै समूहको उपसूचक घटेको छ । सबैभन्दा धेरै व्यापार समूहको उपसूचक ३ दशमलव ०९ प्रतिशतले घटेको छ ।

बैंकिङ एक दशमलव २१, विकास बैंक शून्य दशमलव ५६, जलविद्युत् एक दशमलव ५७, लगानी शून्य दशमलव ८३, जीवन बीमा शून्य दशमलव ३१, उत्पादन तथा प्रशोधन एक दशमलव २४ र लघुवित्त एक दशमलव २४ प्रतिशतले घटेको छ ।  म्युचुअल फन्ड शून्य दशमलव ७६, निर्जीवन बीमा शून्य दशमलव १४ र अन्य समूह एक दशमलव ९० प्रतिशतले घटेको छ ।

बोटलर्स नेपाल (तराई)  लिमिटेड र एसियन हाईड्रोपावर लिमिटेडको शेयर मूल्यमा सकारात्मक सर्किट लागेको छ । सबैभन्दा धेरै गुमाउनेमा भने चिर्खुवा हाईड्रोपावर लिमिटेडको शेयर मूल्य ७ दशमलव ७९ प्रतिशतले घटेको छ ।

रकमका आधारमा आज सबैभन्दा धेरै हिमालयन रिइन्स्योरेन्स लिमिटेडको ३६ करोड ७ लाख ४६ हजार ४ सय ५२ रुपैयाँ बराबरको कारोबार भएको छ । कारोबार सङ्ख्याका आधारमा भने अपर तामाकोशी हाइड्रोपावर लिमिटेडको १३ लाख ७६ हजार ७ सय ९४ कित्ता शेयर किनबेच भएको छ ।