काठमाडौँ । सौर्य एयरलाइन्सको जहाज दुर्घटनामा १८ जनाको जीवन गुमेको छ । जीवन गुमाउनेमा सबै एयरलाइन्सकै स्टाफ छन् । नेपाल नागरिक उड्डयन प्राधिकरणले दुर्घटनामा १८ जनाको मृत्यु र एक जना घाइते भएको जनाएको छ ।

त्रिभुवन अन्तर्राष्ट्रिय विमानस्थल बुधबार बिहान करिब ११ बजे पोखराका लागि उडेको सौर्य एयरलाइन्सको 9N-AME जहाज धावनमार्ग छोडेर दुर्घटना भएको हो । सौर्य एयरको जहाज मर्मतका लागि कर्मचारी र प्राविधिक लिएर पोखरा उड्दा दुर्घटनामा परेको हो ।  जहाजमा चालक दलसहित १९ जना सवार थिए ।  जहाजमा सवार मध्ये  क्याप्टेन बाहेक सबैको मृत्यु भएको छ । जहाजका क्याप्टेन मनिषरत्न शाक्यलाई भने दुर्घटनास्थलबाट उद्दार अस्पताल लगिएको छ । ३७ वर्षीय क्याप्टेन शाक्यलाई सिनामंगलस्थित केएमसी अस्पताल लगिएको हो । 

प्राधिकरणको खोज तथा उद्धार समन्वय केन्द्रले जारी गरेको विज्ञप्तिमा आगलागी नियन्त्रणमा लिई १८ शव संकलन गरिएको उल्लेख छ ।