हेटौंडा । बागमती प्रदेशको मुख्यमन्त्रीमा कांग्रेस संसदीय दलका नेता बहादुरसिंह लामा नियुक्त हुनुभएको छ । कांग्रेस र एमालेका ६४ जना सांसदको समर्थनमा उहाँलाई प्रदेश प्रमुख यादवचन्द्र शर्माले संविधानको धारा १६८ (२) अनुसार मंगलबार मुख्यमन्त्रीमा नियुक्त गर्नुभएको हो ।

कांग्रेस–एमाले गठबन्धन बनेपछि अल्पमतमा परेका तत्कालीन मुख्यमन्त्री शालिकराम जम्कट्टेलले आइतबार पदबाट राजीनामा दिएपछि नयाँ सरकार गठनका लागि आह्वान भएको थियो । 

नवनियुक्त मुख्यमन्त्री लामाले बुधवार ११ बजे प्रदेश प्रमुख कार्यालयमा शपथ लिने कार्यक्रम तय भएको कांग्रेस प्रमुख सचेतक गोविन्द लम्सालले जानकारी दिनुभएको छ । उहाँका अनुसार मुख्यमन्त्री लामाले बुधबार नै कांग्रेसका ६ र एमालेका ६ मन्त्रीसहित १३ सदस्यीय मन्त्रीपरिषद्लाई एकै पटक पूर्णता दिने तयारी गर्नुभएको छ ।

नवनियुक्त मुख्यमन्त्री लामा बागमती प्रदेशको पाँचौ मुख्यमन्त्री बन्नुभएको छ । यसअघि प्रदेश सभाको पहिलो कार्यकालमा एमालेबाट डोरमणि पौडेल र अष्टलक्ष्मी शाक्य तथा एकीकृत समाजवादीबाट राजेन्द्र पाण्डे मुख्यमन्त्री बन्नुभएको थियो । दोस्रो कार्यकालमा माओवादीका शालिकराम जम्कट्टेलले करिब १८ महिना मुख्यमन्त्री बन्नुभएको थियो ।

कांग्रेस र एमालेबीच २०–२० महिना सरकारको नेतृत्व गर्ने सहमति
 
यसैबीच बागमतीमा कांग्रेस र एमालेबीच आलोपालो २०–२० महिना सरकारको नेतृत्व गर्ने सहमति भएको छ । मंगलबार कांग्रेस र एमालेका नेताहरूबीच प्रदेशसभाको बाँकी अवधिमा दुई दलले आधा–आधा कार्यकाल सरकारको नेतृत्व गर्ने सहमति भएको कांग्रेस प्रमुख सचेतक लम्सालले बताउनुभयो ।  ‘पहिलो खेप हाम्रो दलबाट मुख्यमन्त्री बन्नु भएको छ, दोस्रो खेपमा एमालेबाट मुख्यमन्त्री बन्ने सहमति छ,’ उहाँले भन्नुभयो ।