चितवन ।  नेपाली कांग्रेसका नेता बिमलेन्द्र निधिले अहिले सरकारमा जाने कांग्रेसको कुनै योजना नभएको बताउनुभएको छ । यहाँ आज सञ्चारकर्मीसँग कुराकानी गर्दै उहाँले कांग्रेसले प्रतिपक्षको भूमिका सशक्त रुपमा निर्वाह गर्ने बताउनुभयो । 

कांग्रेस प्रतिपक्षको भूमिकामा रहन्छ । हामी पार्टीलाई सङ्गठन सुद्धिकरण अभियानमा लैजाने तयारीमा छौँ’ नेता निधिले भन्नुभयो । संसदीय प्रणालीमा लोकतान्त्रीक शक्ति सत्तापक्षमा वा प्रतिपक्षमा बस्ने उहाँको भनाइ छ ।

फरक प्रसङ्गमा नेता निधिले संविधानमा मध्यावधी निर्वाचन तथा संसद् विघटन गर्ने व्यवस्था नभएको उल्लेख गर्नुभयो । ‘मुलुक मध्यावधि निर्वाचनमा जाने स्थिति देखिएको छैन’ उहाँले भन्नुभयो । 

मधेश प्रदेशमा  कांग्रेस, नेकपा एकीकृत समाजवादीसहितका दलको सरकार बन्ने सम्भावना बढेर गएको नेता निधिको भनाइ छ । यसबारे विषयमा छलफल सकारात्मक रुपमा भइरहेको उहाँले जानकारी दिनुभएको छ । 

सहकारी ठगि प्रकरणमा संसदीय छानविन समिति बन्नु कांग्रेसका लागि ठूलो सफलता भएको उहाँले बताउनुभयो ।