बाँके । कोहलपुर नगरपालिकाका मेयर पूर्णप्रसाद आचार्यले नीति निर्माणमा युवाहरूको अर्थपूर्ण सहभागी हुन आवश्यक रहेको बताउनुभएको छ ।   कोहलपुर नगर युवा संजालले आयोजना गरेको कार्यक्रमलाई सम्बोधन गर्दै मेयर आचार्यले यस्तो धारणा राख्नुभएको हो । 

‘अवसर हामीलाई दिनुहोस्, परिवर्तन सबैका लागि ल्याउने छौं’ भन्ने नाराका साथ शुक्रवारदेखि कोहलपुरमा युवा संजालको ४ दिने सम्मेलन शुरु भएको छ । 

युवाहरूको लागि नगरपालिका सक्रिय भएर युवा लक्षित कार्यक्रमहरू गर्न प्रतिवद्ध रहेने बताउँदै मेयर आचार्यले युवाहरूलाई सामाजिक, आर्थिक तथा राजनीतिक परिवर्तनका लागि मेरुदण्डको रुपमा उभिन आग्रह गर्नु भएको थियो । युवा जागरणका यस्ता कार्यक्रमहरुले युवाहररूलाइ रचनात्मक बताउन सहयोग पुग्ने उहाँको तर्क थियो । 

कोहलपुर नगर युवा संजालका अध्यक्ष रमेश वरले लुम्बिनी प्रदेशमा तेस्रोपटक कोहलपुरमा नमुना नगरसभा गरिएको जानकारी गराउँदै स्थानीय सरकारले बजेट तथा नीति कार्यक्रम बनाउँदा युवाहरूको अर्थपूर्ण सहभागिता गर्न आग्रह गर्नुभयो ।  


कोहलपुर नगरपालिकाका उपमेयर संगिता सुवेदीले युवाहरुलाई स्थानीय सरकारका कार्यक्रममा सक्रिय सहभागी रहन आग्रह गर्दै कोहलपुर नगरपालिकामा किशोरी संजाल गठन गरिने बताउनु भएको छ । जसले गर्दा किशोरीहरूको  समस्या सहजरूपमा समधान गर्न सकिने उहाँको धारणा थियो । 


उक्त कार्यक्रमलाई सम्बोधन गर्दै कोहलपुर नगरपालिकाका प्रमुख प्रशासकीय अधिकृत ढोलक राज ढकालले यस्तो कार्यक्रमले भविष्यमा युवाहरूले जुनसुकै क्षेत्रमा महत्त्वपूर्ण भूमिका खे ल्नसक्ने सक्ने सक्षम युवा उत्पादन गर्ने विश्वास व्यक्त गर्नुभयो । 

कोहलपुर नगरपालिका सामाजिक विकास समिति संयोजक ईश्वरी प्रसाद बिश्वकर्माले शुभकामना मन्तव्य राख्दै राजनैतिक, आर्थिक, सामाजिक र भौतिक रूपमा युवाहरूको अनिवार्य सहभागी हुन आवश्यक रहेको बताउनु भयो । कोहलपुर नगरपालिकाले गर्ने हरेक कार्यक्रममा युवाहरूलाई सहभागी गराइने प्रतिवद्धता व्यक्त गर्नु भएको छ । 

४ दिन सम्म चल्ने यो कार्यक्रममा कोहलपुर नगर क्षेत्रका ६१ जना युवाको सहभागिता छ ।