चितवन । इच्छाकामना गाउँपालिकाले शहीद परिवारलाई नगदसहित सम्मान गरेको छ । 

शहीद दिवसका दिन बुधबार इच्छाकामना–२ स्थित हपनीमा एक कार्यक्रमको आयोजना गरी गाउँपालिकाका शहीद का परिवारलाई ५ हजार रुपैयाँसहित सम्मान गरेको हो । बागमती प्रदेशका वन तथा वातावरणमन्त्री कृष्णप्रसाद सिलवालले उहाँहरूलाई  सम्मान गर्नुभएको हो ।  उहाँले शहीदहरुका कारण देशमा परिवर्तन सम्भव भएको बताउनुभयो । 

गाउँपालिका अध्यक्ष दानबहादुर गुरुङले प्रतिपरिवार ५ हजार रुपैयाँ प्रदान गरिएको बताउँदै उहाँले आगामी दिनमा शहीद परिवारका आवश्यकतालाई पनि सम्बोधन गरिने प्रतिवद्धता व्यक्त गर्नुभयो ।

गाउँपालिकाले २०३४ सालको पञ्चायती शासनविरुद्धको  जुगेडी काण्डका सहिद वडा नम्बर २ का दशरथ चेपाङ, सन्तबहादुर चेपाङ, चन्द्रबहादुर चेपाङका साथै जनयुद्धका वडा नम्बर २ का जीवन बुढाथोकी र वडा नम्बर ३ का चन्द्रबहादुर गुरुङ (दीपेश) को परिवारलाई सम्मान गरेको हो ।