पाँचथर । पाचौँ पाँचथर गोल्डकप फुटबल प्रतियोगिता आउने फागुनको अन्तिम साता हुने भएको छ । 

प्रतियोगिता फागुन २४ देखि चैत २ गतेसम्म सञ्चालन हुने आइतबार यहाँ पत्रकार सम्मेलनमा जानकारी दिइएको छ । 

फिदिम माध्यमिक विद्यालयको खेलमैदानमा हुने प्रतियोगितामा स्वदेश र विदेशका गरी आठ टोली सहभागी हुने प्रतियोगिता आयोजक पाँचथर क्लबले जनाएको छ । ‘ए’ डिभिजन खेल्ने केही क्लबसहित दुई विदेशी टोली स्पर्धा गर्न आउने क्लबका अध्यक्ष कमल तुम्रोकले जानकारी दिनुभयो । 

प्रतियोगितामा प्रथम हुने टोलीले  ११ लाख १ हजार १ सय ११ रुपैयाँ र उपविजेतालाई ५ लाख ५५ हजार ५ सय ५५ रुपैयाँ पुरस्कार प्रदान गरिनेछ । प्रतियोगिताका निम्ति  ७० लाख  रुपैयाँ विनियोजन भएको अध्यक्ष तुम्रोकले बताउनुभयो । 

आयोजक क्लबले आज पाँचथरको फिदिममा पत्रकार सम्मेलनको आयोजना गरी प्रतियोगिताबारे जानकारी दिएको हो । 

चौथो पाँचथर गोल्डकपको उपाधि त्रिभुवन आर्मी फुटवल क्लबले जितेको थियो ।