काठमाडौंँ । प्रधानमन्त्रीका प्रमुख राजनीतिक सल्लाहकार हरिबोल गजुरेलले पदबाट राजीनामा दिनुभएको छ । 

प्रधानमन्त्री पुष्पकमल दाहालका प्रमुख सल्लाहकार आफूले मंसिर २० गते नै पदबाट राजीनामा दिएको तर अहिलेसम्म स्वीकृत भने नभएको जानकारी दिनुभएको छ । ‘प्रधानमन्त्रीको प्रमुख राजनीतिक सल्लाहकार पदबाट मैले राजीनामा बुझाएको छु, तर अहिलेसम्म स्वीकृति भएको खबर आइसकेको छैन’ उहाँले भन्नुभयो ।  प्रधानमन्त्रीका प्रमुख सल्लाहकार राजीनामा दिनुको कारण भने खुलाउन चाहनु भएन । ‘राजीनामा स्वीकृत भएपछि यसको कारण सार्वजनिक गरौंला’ उहाँले भन्नुभयो । 

नेकपा माओवादी केन्द्रका नेता गजुरेलले गत वर्ष  मंसिरमा भएको निर्वाचनमा सिन्धुलीबाट प्रतिनिधिसभा सदस्य उम्मेदवार बन्न चाहनु भएको थियो । तर उहाँले टिकट पाउनु भएन । प्रतिनिधिसभा सदस्यको टिकट नपाएर पार्टी नेतृत्वसँग असन्तुष्ट बन्नुभएका गजुरेललाई प्रधानमन्त्री दाहालले २०७९ माघ ९ गते प्रमुख राजनीतिक सल्लाहकार नियुक्त गर्नुभएको हो । 

प्रधानमन्त्रीको सचिवालयमा पछिल्लो समय छोरी गंगाको हैकम चल्न थालेपछि गजुरेलले प्रमुख सल्लाहकारबाट राजीनाना दिनुभएको स्रोतले बताएको छ । यद्यपि गजुरेलले भने यसबारे केही प्रतिक्रिया जनाउनुभएको छैन ।