कालीकोट । कालीकोट– जुम्ला सडक स्तरोन्नति गर्न थालिएको छ। आर्थिक वर्ष २०७९/८० मा बजेट सुनिश्चित गरी काम अघि बढाइएको हो । 

कालीकोटको दहीखोलादेखि नाग्म हुँदै जुम्ला बजारसम्म १ सय ४ किलोमिटर सडकखण्डमा गत २०८० असारमा ८ खण्डमा ठेक्का सम्झौता भएर अहिले स्तरोन्नतिको कामले तीब्रा पाएको छ । कर्णाली राजमार्गको कालीकोटको दहीखोलादेखि नाग्म हुँदै जुम्ला बजारसम्म सडक स्तरोन्नति काम भइरहेको जुम्लास्थित सडक डिभिजन कार्यालयका प्रमुख दीपेन्द्र बिष्टले बताउनुभयो । ‘राजमार्गमा सडकको नियमित कामसँगै सडक मर्मतको काम थालिएको छ’ उहाँले भन्नुभयो– ६ महिनामा काम सक्नेगरी ठेक्का सम्झौता गरिएको छ । सम्झौताअनुसार पुस मसान्तमा काम गरिसक्नुपर्छ ।’

सडक मर्मतको काम अन्तिम चरणमा पुगेको र मर्मतका लागि ८० करोड रुपैयाँ विनियोजन भएको प्रमुख बिष्टले जानकारी दिनुभयो । ‘साँघुरा सडक फराकिलो बनाउने, पहिरो गएको स्थानमा पर्खाल निर्माण गर्ने, नाला निर्माण गर्नेलगायत काम भइरहेका छन्’ उहाँले भन्नुभयो– वर्षेनी पहिरो जाँदा सडक अवरुद्ध हुने गरेपछि मर्मत गर्न गरिएको छ ।’ आवश्यकताका आधारमा ग्याविन वाल निर्माण पनि गरिएको कार्यालयले जनाएको छ ।

विश्व बैङ्कको आर्थिक सहयोगमा निर्माण भएको राजमार्ग २०६३ चैतदेखि  सञ्चालनमा आएको थियो । साँघुरो, हिलाम्य र खाल्डाखुल्डीका कारण राजमार्गमा यात्रा गर्ने यात्रुले वर्षेनी सास्ती खेप्दै आएका थिए । राजमार्गमा हुने सडक दुर्घटनाले वर्षेनी सयौँ यात्रुले ज्यान गुमाउनु परेको थियो । सडक स्तरोन्नति र मर्मतले यसमा कमी आउने कार्यालयले विश्वास लिएको छ । कार्यालयका अनुसार सुर्खेतदेखि दैलेख हुँदै कालीकोटसम्म स्तरोन्नति र मर्मतको काम सुर्खेतस्थित सडक डिभिजन कार्यालयले गरिरहेको छ ।