काठमाडोँ ।   पाकिस्तानका पूर्वप्रधानमन्त्री इमरान खानविरुद्धको मानहानी मुद्दा खारेज भएको छ । 

पूर्वप्रधानमन्त्री खानविरूद्ध पूर्व प्रधानन्यायाधीश इफ्तिखार मोहम्मद चौधरीले २०अर्ब पाकिस्तानी रुपैयाँ बिगो दाबीसहित दायर गरेको मानहानीको मुद्दालाई इस्लामावादको एक जिल्ला अदालतले शनिबार खारेज गरेको हो ।

जुलाई २०१४ मा चौधरीले इमरान खानलाई सन् २०१३ को आम चुनावमा धाँधली गरेको र उहाँद्वारा सार्वजनिक एक वक्तव्यमा आफूविरुद्ध अपमानजनक टिप्पणी गरेको आरोप लगाउँदै २० अर्ब पाकिस्तानी रुपैयाँ बिगो दाबीसहित मानहानीको सूचना जारी गर्नुभएको थियो । 

खानले आफ्नो भनाइका लागि माफी नमागे कानुनी प्रक्रिया शुरु गर्ने चेतावनी सूचनापछि चौधरीको कानुनी टोलीले दिएको थियो ।  चौधरीले जनवरी २०१५ मा औपचारिक रूपमा मुद्दा दर्ता गर्नुभएको थियो । मुद्दामा पाकिस्तानका पूर्व प्रधानन्यायाधीशले २७ जुन २०१४ मा इमरान खानद्वारा सार्वजनिक एक वक्तव्यमा आफूविरुद्ध अपमानजनक टिप्पणी गरेको आरोप लगाउनुभएको थियो । 

द एक्सप्रेस ट्रिब्यूनको रिपोर्टअनुसार लामो प्रक्रियापछि अदालतले इमरानको पक्षमा फैसला सुनाएको छ र चौधरीद्वारा दायर गरिएको मुद्दा खारेज गर्दै मानहानीको सूचना हद नागेपछि जारी गरिएको बताएको छ । न्यायाधीश हसिना सकलैनले आफ्नो फैसलामा भन्नुभएको छ– ‘मुद्दाअनुसार अन्तिम कथित मानहानिपूर्ण बयान सन् २०१४ जुन २७ मा गरिएको थियो र मुद्दा  सन् २०१५ को जनवरी २० मा दायर गरिएको थियो । मुद्दा दायर गर्दा छ महिना २४ दिन हद नागिसकेकोले मुद्दालाई खारेज गरिएको छ ।’ 

अदालतले मानहानिसम्बन्धी सामग्री प्रकाशित भएको मितिले ६ महिनाभित्र मानहानि मुद्दा दायर गर्नुपर्ने र त्यसो गर्न नसके मानहानि अध्यादेश २००२ को दफा १२ अनुसार मुद्दा गर्न नमिल्ने उल्लेख गरेको छ । 

सन् २०२२ को अप्रिलमा अविश्वासको प्रस्तावमार्फत सत्ताच्युत भएयता पाकिस्तान तेहरीक–ए–इन्साफ (पीटीआई) का संस्थापक नेता तथा पूर्वप्रधानमन्त्री खानले थुप्रै कानुनी चुनौतीको सामना गर्दै आउनुभएको छ । उहाँ हाल रावलपिण्डीस्थित पाकिस्तानी केन्द्रीय कारागारमा हुनुहुन्छ ।

यो खबर पढेर तपाईलाई कस्तो महसुस भयो ?

0 %

0 %

0 %

0 %

0 %

0 %