काठमाडौं । पश्चिम नेपालमा हिमपात र वर्षा भएको छ । सुदूरपश्चिम, कर्णाली र लुम्बिनी प्रदेशका उच्च पहाडी भागका केही ठाउँमा सोमबार बिहानदेखि  हिमपात र वर्षा भएको जल तथा मौसम विज्ञान विभागले  जनाएको छ ।

मौसम पूर्वानुमान महाशाखाका अनुसार हुम्ला सदरमुकाम सिमकोटमा अहिले पनि हिमपात भइरहेको छ । हिमपातको कारण त्यहाँको जनजीवन प्रभावित भएको छ ।  सुर्खेतको वीरेन्द्रनगर र आसपासका क्षेत्रमा आइतबार रातिदेखि  सामान्य वर्षा भइरहेको छ । 

मौसमविदहरुले पश्चिमी वायुको प्रभावको कारण मुलुकको विभिन्न स्थानमा सामान्य हिमपात र छिटफुट वर्षा भइरहेको बताएका छन् । यसको प्रभाव केही दिन रहने मौसमविदहरुको अनुमान छ ।  

मौसमविदका अनुसार गण्डकी र बागमती प्रदेशमा सोमबार बिहानै देखि बादल लागेको छ  ।  काठमाडौं उपत्यकामाबिहानदेखि  कहिले घाम लाग्ने र कहिले बादल लाग्ने भइरहेको छ । काठमाडौं उपत्यकामा अघिल्लो दिनको तुलनामा सोमबार चिसो बढेको छ ।