काठमाडौँ ।  पूर्वगृहमन्त्री  तथा राष्ट्रिय स्वतन्त्र पार्टी (रास्वपा) का सभापति रवि लामिछाने बुटवलस्थित सुप्रिम सहकारीको रकम अपचलन मुद्धामा १ करोड रुपैयाँ धरौटी बुझाएर रिहा भएका छन् । 

लामिछानेलाई सहकारीको रकम अपचलन प्रकरणमा रुपन्देही जिल्ला अदालतले आइतबार १ करोड धरौटीमा रिहा गर्न आदेश दिएको थियो ।  लामिछाने अदालतको आदेशसँगै धरौटी बुझाएर आइतबार बेलुकी रिहा भएका हुन्  । लामिछानेले बैंक ज्ञारेन्टीमार्फत अदालतमा धरौटी बुझाएका हुन् ।

हकारीको रकम अपचलन प्रकरणमा गएको बुधबारदेखि भएको बयान, थुनछेक र जवाफी बहसपछि जिल्ला न्यायाधीश प्रल्हादकुमार योगीको इजलासले लामिछानेलाई १ करोड रुपैयाँ धरौटी छाड्न आदेश गरेको हो ।

थुनछेक बहसमा सरकारी वकिलहरुले लामिछाने बाहिर रहँदा पीडितहरुको न्याय प्रभावित हुने भन्दै थुनामा पठाउनुपर्ने जिकिर गरेका थिए । तर, लामिछाने पक्षका वकिलहरूले राज्यले प्रतिशोध साँधेको जिकिर गरेका थिए ।

इलाका प्रहरी कार्यालय, बुटवलले गरेको अनुसन्धानका आधारमा रविविरुद्ध जिल्ला अदालत, रुपन्देहीमा मुद्दा दर्ता भएको हो ।