काठमाडौँ । नेकपा माओवादी केन्द्रको विद्यार्थी संगठन अखिल क्रान्तिकारीको २३ औं राष्ट्रिय सम्मेलन मतगणना अनिश्चिकालका लागि स्थगित भएको छ । सम्मेलनको उपत्यका विशेष प्रदेश र विश्वविद्यालय प्रदेशतर्फको मतगणना अनिश्चिकालका लागि स्थगित गरिएको हो ।

शनिबार भएको मतदानको मतगणना भइरहँदा मधेसको गणना विवाद भएको थियो । आइतबार बिहानदेखि रोकिएको मतदान अझै शुरु गरिएको छैन । विश्वविद्यालय प्रदेश समिति र उपत्यका विशेष समितिका निर्वाचन समितिले विज्ञप्ति निकालेर मतगणना अर्को सूचना जारी नभएसम्म स्थगित भएको जानकारी गराएका छन् ।

विश्वविद्यालय प्रदेश समितिका तर्फबाट निर्वाचन समितिका अर्जुन अधिकारी र उपत्यका विशेष समितिबाट प्रा डा जगत पोखरेलले सूचना निकाल्नु भएको हो ।  मधेस प्रदेशबाट १ सय ५९ मत खसेको तर गणनाको क्रममा त्यो भन्दा ५ मत कम भेटिएपछि विवाद भएको हो ।

संस्थापन पक्षले पुनः मतदानको माग गरेको छ भने अर्को पक्षले मतदान सम्भव नहुने अडान लिएको छ । विद्यार्थी संगठनका नेताहरूका अनुुसार अध्यक्षका प्रत्यासीसँग निर्वाचन आयोगका सदस्यहरूबीच छलफल जारी छ ।