पर्सा । वीरगञ्ज भन्सार नाकाबाट निर्यात बढेको छ । चालु आर्थिक वर्षको ६ महिनामा २९ अर्ब २७ करोड ८२ लाख ४ हजार रुपैयाँ मूल्य बराबरका वस्तु तथा सामान विदेशी मुलुकमा निर्यात भएको छ । 

आव २०८० र ८१ को ६ महिनाको तुलनामा चालु आवको यही अवधिमा  निर्यात शतप्रतिशत अर्थात् १४ अर्ब ७१ करोड रुपैयाँले निर्यात वृद्धि भएको वीरगञ्ज भन्सारले जनाएको छ । 

वीरगञ्ज भन्सार कार्यालयका सूचना अधिकारी अमित तिवारीले चालु आवको ६ महिनाको अवधिमा प्रशोधित भटमास र सूर्यमुखी तेल छिमेकीमुलुक भारत बढेकाले समग्रमा निर्यात बढेको बताउनुभयो । ‘गत आवको तुलनामा चालु आर्थिक वर्षमा समग्रमा प्रशोधित भटमास र सूर्यमुखीको तेल निर्यात बढेको छ’ उहाँले भन्नुभयो– ‘अन्य कपडाजन्य सामग्री पनि बढेकाले निर्यात करिब दोब्बर भएको हो ।’

गत आवको ६ महिनामा यो नाका हुँदै १४ अर्ब ५६ करोड ७१ लख ८५ हजार रुपैयाँ मूल्य बराबरका वस्तु तथा सामान विदेशमा निर्यात भएको थियो । कार्यालयले चालु आवको ६ महिनामा वस्तु तथा सामान निर्यात गरेवापत  १७ करोड ६६ लाख ६३ हजार रुपैया राजस्व सङ्कलन गरेको थियो ।
 
गत आवको त्यही अवधिमा निर्यात गरेवापत भने ् १० करोड तीन लाख ८१ हजार रुपैयाँ राजस्व सङ्कलन गरेको थियो । वीरगञ्ज नाका हुँदै  विशेषगरी भटमासको तेल प्रशोधित, सूर्यमुखीको प्रशोधित तेल, सेन्थेटिक यार्न, पशु आहाराको कच्चा पदार्थ, विभिन्न किसिमका कपडा, सिन्थेटिक कपडा लगायत छन् ।

वीरगञ्ज नाका हुँदै चालु आवको ६ महिनामा २ खर्ब ७७ अर्ब १५ करोड ५७ लाख १६ हजार रुपैयाँ मूल्य पर्ने वस्तु तथा सामान आयात भएको थियो । त्यसैगरी, गत आवको ६ महिनाकै अवधिमा भने २ खर्ब ६० अर्ब ३६ करोड ६१ लख ६६ हजार रुपेयाँ मूल्य पर्ने वस्तु तथा सामान आयात भएको थियो । 

गत आवको तुलनामा चालु आवको त्यही अवधिमा आयात पनि छ दशमलव ४५ प्रतिशतले बढेको छ ।