काठमाडौँ । म्यान्मारमा सैनिक हवाई आक्रमणमा ११ जना सर्वसाधारणको मृत्यु भएको छ । 

म्यान्मारको उत्तरी शान राज्यमा भएको सैन्य हवाई आक्रमणमा ११ सर्वसाधारणको मृत्यु र ११ जना घाइते भएको जुन्तासँग लडिरहेको जातीय सशस्त्र समूहका प्रवक्ताले शुक्रबार बताएका छन् । ‘सेनाले शुक्रबार स्थानीय समयानुसार करिब राति एक बजे नम्हकम शहरका दुईवटा क्षेत्रमा बमबारी गर्यो’  ता’आङ नेसनल लिबरेसन आर्मी (टिएनएलए) का ल्वे याय ऊले भन्नुभयो । उहाँका अनुसार आक्रमणमा ११ जनाको मृत्यु र अन्य ११ जना घाइते भए । आक्रमणमा स्थानीय राजनीतिक दलको एउटा कार्यालय क्षतिग्रस्त भएको छ । 

नम्हकम चीनको युनान प्रान्तको सीमाबाट करिब पाँच किलोमिटर टाढा छ । गत वर्ष धेरै साताको लडाइँपछि टिएनएलएका लडाकूहरूले उक्त सहरलाई नियन्त्रणमा लिएको दाबी गरेको थियो । सामाजिक सञ्जालमा राखिएका तस्बिरहरूमा मानिसहरूले भग्नावशेषबाट घाइेत एक युवकलाई बोकेर लैजाँदै गरेको देखाइएको थियो । एउटा भिडियोमा धेरै भवन क्षतिग्रस्त भएको देखाइएको छ । 

एएफपी संवाददाताहरूले त्यो भिडियो नम्हकम साइटमा जियोलोकेसन गर्दै त्यो लोकेसेन कहिल्यै अनलाइन देखानपरेको बताएका छन् ।