बागमती ।   मकवानपुरको बकैया गाउँपालिका–१२ स्थित डाँडामा आवतजावत गर्न नयाँ ट्र्याक खोलिएको छ ।  वर्षोदेखि बाटोको समस्या भोग्दै आएका स्थानीयवासीको सुविधाका लागि शहरी विकास तथा भवन कार्यालय मकवानपुर हेटौँडाले करिब एक किलोमिटरको नयाँ ट्र्याक खोलेको हो । 

जितपुर–फेदी मोटर बाटोका लागि ट्र्याक खोलिएको कार्यालय प्रमुख ई भूमिनन्द ढकालले जानकारी दिनुभयो ।  नयाँ ट्र्याक खालिएसँगै सो क्षेत्रका बासिन्दालाई सदरमुकाम हेटौँडालगायत बजार आवतजावत गर्न सहज भएको छ । ‘डाँडामा बस्ती छ, तर बाटोघाटो नहुँदा हामी असाध्यै समस्यामा थियौँ’ बकैया गाउँपालिका–१२ का नीरज घलानले भन्नुभयो– ‘अब बाटोका लागि ट्र्याक खोलिएपछि आवतजावत गर्न सहज भएको छ ।’ उहाँले नयाँ ट्र्याक खोलिएको बाटोलाई आगामी दिनमा बाटो स्तोन्नति गर्न माग गर्नुभयो । यस्तै त्यो कार्यालयले आव २०८०/८१ मा मकवानपुर र चितवनका ५० किलोमिटर सडकमा कालोपत्र गरेको छ । 
 
कार्यालयका अनुसार आव २०८०/८१ मा मकवानपुरमा २८ किलो किमी र चितवनका २२ किमी कालोपत्र गरिएको छ । ती दुवै जिल्लाका २५ सडकमा कालोपत्र गरिएको कार्यालय प्रमुख ई ढकालले जानकारी दिनुभयो । 

उहाँका अनुसार त्यो आवमा मकवानपुर र चितवनमा निर्माणाधीन चार कल्र्भटको निर्माण सम्पन्न भइसकेको छ । पर्यटकलाई आकर्षित गर्ने उद्देश्यले आव २०८०/८१ म चितवनको माडी र रत्ननगर दुई उद्यानसमेत निर्माण गरिएको प्रमुख ढकालले बताउनुभयो ।