काठमाडौँ । नेपाली कांग्रेसका सभापति शेरबहादुर देउवाले पदाधिकारी तथा पूर्व पदाधिकारीको बैठक बोलाउनुभएको छ । शनिबार विहान ९ बजे देउवा निवास बुढानीलकण्ठमा बस्ने गरी पदाधिकारी बैठक बोलाइएको हो । 

भदौ १६ मा बस्ने केन्द्रीय समिति अघि महामन्त्री गगन थापा र विश्वप्रकाश शर्माको प्रतिवेदनमा सहमति खोज्न देउवाले शीर्ष नेताको बैठक बोलाउनुभएको हो । सभापति देउवाले मंगलबार र विहीबार (आज) दुई महामन्त्रीको प्रस्ताव परिमार्जनका लागि उपसभापति र महामन्त्रीहरुसँग छलफल गर्नुभएको थियो । 

पार्टी स्रोतका अनुसारका दुई दिनको बैठकमा सहमति जुट्न सकेको छैन । चुनावी तालमेल नगर्ने, एक्जिट पोलिसी र महाधिवेशनको कार्यतालिकामा सहमति जुट्न सकेको छैन । ‘मुख्यत तीन एजेण्डामा दुई दिनको छलफलमा भएको छ । दुई महामन्त्री पछि नहटेपछि छलफल विना निष्कर्ष टुंगिएजस्तै छ ।’ शीर्ष तहका एक नेताले भन्नुभयो ।