भोजपुर । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले वर्तमान सरकारबाट सत्तारुढ ठूलो दल नेपाली कांग्रेस नै आजित भएको बताउनुभएको छ ।  

एमाले अध्यक्ष ओलीले बिहीबार महाकाली–मेची अभियानअन्तर्गत भोजपुरमा आयोजित सभालाई सम्बोधन गर्दै यस्तो भनाई व्यक्त गर्नुभएको हो । ‘सत्तामा रहेका कांग्रेसका नेताहरु नै वर्तमान सरकारको काम कारबाहीबाट सन्तुष्ट छैनन’ सभामा उहाँले भन्नुभयो–  ‘अहिलेको यो सरकारसँग ‘नेपाली कांग्रेसकै नेताहरु नै आजित भइसकेका छन्,  राजनीति, अर्थतन्त्र बिग्रिएको देखेर ।’

एमाले अध्यक्ष ओलीले देश दिनदिनै ओरालो लागेको उल्लेख गर्दै यस्तो अवस्थाबाट सबैमा चिन्तित भएको बताउनुभयो । ‘एमालेको सरकार बलजफ्ती देशी, विदेशी शक्तिबाट ढाइ वर्षअघि हटाइएपछि त्यसयता देशको अवस्था अत्यन्त नाजुक हुँदै गएको छ’ उहाँले भन्नुभयो । 

ओलीले देशमा सुशासन र विकासको पक्षमा कुनै एउटा राष्ट्रिय शक्ति भएन भने देश समृद्ध बन्न नसक्ने दाबी गर्नुभयो ।  ‘यो देशमा एउटा राष्ट्रिय शक्ति मजबुत भएन भने, यो देशमा सुशासन र विकासको पक्षमा जनशक्ति भएन भने, शान्ति सुव्यवस्थासम्बन्धी कायम गर्न र एकतावद्ध भएर राष्ट्रनिर्माणको कामलाई एकतावद्ध बनाउन सकेनौँ भने देश बर्बाद हुँदैछ’ उहाँले भन्नुभयो– ‘तसर्थ हामीले अब समृद्ध नेपाल र सुखी नेपाली बनाउनका लागि अन्तततोगत्वा पनि मिसन ०८४ लाई सफल पार्नैपर्छ ।’