भैरहवा । सहकारी ठगी प्रकरणमा पक्राउ परेका पूर्वगृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछानेलाई  भैरहवास्थित कारगार(जेल)मा राखिएको छ । अदालतले थुन्न आदेश दिए लगत्तै शुक्रबार राति काठमाडौँस्थित आफ्नै निवासबाट पक्राउ गरिएका लामिछानेलाई आज जिल्ला कारागार भैरहवा पुर्‍याइएको हो ।

लामिछानेलाई पक्राउ गरेर चैत २३ गते यति एअरलाइन्सको विमानमार्फत गौतमबुद्ध विमानस्थल भैरहवा ल्याइएको  थियो। लामिछानेलाई भैरहवा ल्याएर जिल्ला प्रहरी कार्यालयको हिरासतमा राखिएको थियो । सरकारी विदाको कारण दुई दिन हिरासत राखिएका लामिछानेलाई आज कारागार पठाइएको हो । 

लामिछानेलाई आज जिल्ला अदालत रुपन्देही लगेर थुनुवा पुर्जी दिई कारागार ल्याइएको जिल्ला प्रहरी कार्यालय रुपन्देहीका सूचना अधिकारी डिएसपी सुरज कार्कीले जानकारी दिनुभएको छ । डिएसपी कार्कीका अनुसार लामिछाने अब अदालतको फैसला नआउन्जेल  कारागारमै रहने छन् ।

उच्च अदालत तुलसीपुरको बुटवल इजलासले गत  शुक्रबार लामिछानेलाई सहकारीको रकम ठगी प्रकरणमा पुर्पक्षका लागि थुनामा राख्न आदेश दिएको थियो ।  लामिछानेलाई न्यायाधीशद्वय रमेश ढकाल र स्वीकृति पराजुलीले इजलासले थुन्न दिएको हो । उच्चको आदेशसँगै लामिछाने पक्राउ परेका हुन् ।