काठमाडौँ । नेकपा एमालेका नेता ऐन महरविरुद्ध अनुसन्धान अघि बढाउन उच्च अदालतले आदेश दिएको छ । अदालतको आदेशपछि एमालेका केन्द्रीय सदस्य समेत रहेका महरमाथि अब प्रहरीले बलत्कार मुद्दामा अनुसन्धान अघि बढाउनुपर्ने भएको छ । 

बुधबार उच्च अदालत पाटनले महरमाथि बलात्कार मुद्दामा अनुसन्धान अघि बढाउन प्रहरीलाई आदेश दिएको हो । महरबाट बलात्कृत भएको भन्दै एक महिलाले दिएको जाहेरी जिल्ला प्रहरी परिसर काठमाडौँले तामेलीमा राखिएपछि पीडित महिला अदालत पुगेकी थिइन् । 

जिल्ला सरकारी वकिल कार्यालय काठमाडौँ र जिल्ला प्रहरी परिसर काठमाडौँ समेतलाई विपक्षी बनाएर दायर मुद्दामा न्यायाधीशद्वय ब्रजेश प्याकुरेल र कृष्णराम कोइराला को इजलासले अनुसन्धान अघि बढाउन आदेश दिएको हो ।  

अदालतले अनुसन्धान प्रक्रिया अघि बढाउन आदेश दिएको सो मुद्दामा पीडितको तर्फबाट बहस गरेका अधिवक्ता डा सुरेन्द्र भण्डारीले बताउनुभएको छ । जसअनुसार अब प्रहरीले महरलाई पक्राउ गरेर अनुसन्धान अघि बढाउनुपर्नेछ ।