काठमाडौँ  । ‘टाइगर ग्रुप अफ पोखरा नेपाल’को आयोजनामा पाँचौँ संस्करणको टाइगर कप भलिबल प्रतियोगिता माघ दोस्रो सातादेखि सञ्चालन हुने भएको छ ।  प्रतियोगिता  माघ १२ देखि १९ गतेसम्म सञ्चालन हुनेछ । 

प्रतियोगितामा महिला र पुरुष गरी कूल १२ टोलीको सहभागिता रहने आज यहाँ आयोजित पत्रकार सम्मेलनमा आयोजक संस्थाका अध्यक्ष नारायणप्रसाद शर्माले जानकारी दिनुभयो । उहाँका अनुसार पुरुष र महिलातर्फ एक एक विदेशी टोली  समेत सहभागी हुनेछन् ।   

प्रतियोगितामा पुरुषतर्फ टिपटप हेल्प नेपाल स्पोर्टस् क्बल, गण्डकी प्रदेश भलिबल सङ्घ, त्रिभुवन आर्मी क्लब, नेपाल पुसिल क्लब र नेपाल एपिएफ क्बल सहभागी हुनेछन् । विदेशी टोलीमा भारतको कुरुक्षेत्रको सुनील भलिबल क्लब अमीन रहेको छ । 

त्यसैगरी महिलातर्फ नेपाल एपिएफ क्लब, टिपटप न्यू डायमण्ड युथ स्पोर्टस क्लब, त्रिभुवन आर्मी क्लब र टाइगर गु्रप अफ पोखरा रहेका छन् । महिलातर्फ विदेशी टोली थाइल्याण्डको ट्राभल इन्क्वारी युनाइटेट प्यासन भलिबल क्लब सहभागी हुने आयोजकले जनाएको छ । 

प्रतियोगितामा पुरुष र महिलातर्फका दुवै विजेता टोलीले  पाँच लाख ८५ हजार पाँच सय ५५ रुपैयाँ पुरस्कार पाउनेछन् भने उपविजेताले  दुई लाख ८५ हजार पाँच सय ५५ रुपैयाँ पाउनेछन् । प्रतियोगितामा तेस्रो स्थान हासिल गर्ने टोलीले  एक लाख ८५ हजार पाँच सय ५५ रुपैयाँ पुरस्कार पाउनेछ । 

प्रतियोगिताका सर्वोत्कृष्ट पुरुष र महिला खेलाडीले जनही २५ हजार सात सय ७७ रुपैयाँ पाउनेछन् । त्यसैगरी उत्कृष्ट सर्भर, उत्कृष्ट सेटर, उत्कृष्ट ब्लकर, उत्कृष्ट लिब्रो, उत्कृष्ट स्पाइकर र उत्कृष्ट प्रशिक्षक (पुरुष÷महिला) ले १० हजार पाँच सय ५५ पुरस्कार रुपैयाँ पाउनेछन् । 

 प्रतियोगिताको खेल भने पोखरामा हुनेछ ।