काठमाडौँ । नेकपा माओवादी केन्द्रका अध्यक्ष पुष्पकमल दाहालले देशलाई दुई दलीय अधिनायकवाद तर्फ लैजाने खतरा रहेको भन्दै त्यसविरुद्ध विपक्षीहरूलाई समेटेर लैजानुपर्ने धारणा राख्नुभएको छ । 

बुधबार पार्टीको अनुशासन आयोग, निर्वाचन आयोग र लेखा आयोगको संयुक्त बैठकमा बोल्दै अध्यक्ष दाहालले दुई दलीय अधिनायकवादविरुद्ध सबै प्रतिपक्षलाई समेटेर लैजानुपर्ने बताउनुभएको हो । 

‘भ्रष्टाचार विरोधी अभियान रोकिएको छ, छोपछाप पार्न लागिरहेको छ । लोकतान्त्रिक मूल्य, मान्यता, आदर्श पनि कमजोर हुँदै गइराखेको छ । देशलाई दुई दलिय अधिनायकवादतिर लाने संकेत देखा परेको छ । पश्चगमनतिर जान खोजेको छ । त्यसलाई रोक्नका लागि जनतालाई सुसुचित गर्नुपर्छ । प्रशिक्षित गर्नुपर्छ । पार्टी एकताबद्ध भएर अगाडि बढ्नुपर्छ भन्ने निर्णय भएको छ,’ दाहाललाई उदृृत गर्दै प्रवक्ता अग्निप्रसाद सापकोटाले भन्नुभयो । 

सञ्चारकर्मीहरुको प्रश्नको जवाफ दिँदै प्रवक्ता सापकोटाले प्रधानमन्त्री केपी शर्मा ओलीले जनयुद्धलाई हिंसा भन्नु संविधान विपरीत भएको बताउनुभयो । प्रधानन्त्रीले बृहत शान्ति सम्झौता विपरीत बोलेको उहाँको दाबी छ । नेकपा हुँदा दस्तावेजमै जनयुद्धलाई सशस्त्र सङ्घर्ष लेखिएको भन्दै सो कुरा बिर्सिएर जनयुद्धलाई हिंसा भन्नुमा बदनियत रहेको उहाँले बताउनुभयो ।