काठमाडौँ । राज्यको जिम्मेवार निकायमा  बसेकाहरु यतिखेर  प्रधानमन्त्री केपी शर्मा ओलीको  फलोअर कति घट्यो ? काठमाडौँ महानगरका प्रमुख बालेन्द्र साह (बालेन) को समर्थक कति बढ्यो ? भन्ने ध्याउन्नमै केन्द्रित छन् । 

काठमाडौँ महानगरका प्रमुख बालेनले केही दिनयता प्रधानमन्त्री ओलीविरुद्ध सामाजिक संजाल फेसबुकमा अनफलो अभियान चलाएका छन् । काठमाडौँ मुलुकको प्रशासनिक र व्यापारिक केन्द्र हो । मुलुक संचालन गर्ने अधिकाँश कार्यालय काठमाडौँमै छ । त्यस्तै काठमाडौ उपत्यकासहित बागमती प्रदेशका विभिन्न जिल्लामा बिक्री बितरण हुने खाद्यान्न लगायतका दैनिक उपभोग्य वस्तु बाहिरबाट पहिला काठमाडौँ भित्रिएर अन्यत्र जाने गर्छ । किन कि व्यापारीका ठूला गोदाम अधिकाँश काठमाडौँभित्रै छन् । 

केही दिनयता काठमाडौँ उपत्यकामा दाल, चामल र तरकारी लगायतका दैनिक उपभोग्य वस्तुको भाउ अचाक्ली बढेको छ । सरकारले सर्वसाधरण नागरिकलाई नुन चिनीदेखि खाद्यान्न सर्वशुलभ रुपमा उपलब्ध गराउने उदेश्यले स्थापना गरेको नेपाल खाद्य संस्थान र साल्ट ट्रेडिङका बिक्री डिपोमा नै अघिल्लो सातासम्म २३ सय रुपैयाँमा पाइने गरेको २५ किलोको जिरामसिनो चामलको मूल्य अहिले २५ सय ७५ रुपैयाँ पुगेको छ । त्यस्तै अघिल्लो सातासम्म १ सय ३० रुपैयाँ धार्नीमा पाउने गरेको आलु अहिले २ सय रुपैयाँ नाघिसकेको छ । गत साता प्र किलो १ सय १० रुपैयाँमा पाउने गरेको प्याजको मूल्य अहिले १ सय ८० रुपैयाँ भएको छ । चाडपर्व नजिकिँदै गर्दा दैनिक उपभोग्य वस्तुको मूल्य ह्वात्तै बढेको छ । राज्यले कालो बजारी नियन्त्रण गर्न नसक्दा भाउ अचाक्ली बढेको हो । 

देशभर दैनिक उपभोग्य वस्तुको माग तथा मौज्दात अवस्था हेर्ने निकाय आपूर्ति मन्त्रालय अन्तरगतको निकायको हो । चाडपर्व नजिकिएसँगै हरेक वस्तुको मूल्य बढ्नुको कारणबारे सरकारले नागरिकलाई यसप्रति कुनै जवाफ दिएको छैन । प्रधानमन्त्री ओलीका सचिवालयमा रहेकाहरुलाई जनताको ढाडै सेक्ने  गरी मूल्य बढ्दा यसप्रति खास्सै चासो भएको देखिँदैन । उनीहरु पनि  प्रधानमन्त्री ओलीको फेसबुक पेजमा फलोअर किन घट्यो, बालेनको एक्कासी कसरी बढ्यो ?  भन्नेमै केन्द्रित छन् ।