गोरखा । गण्डकी गाउँपालिकाले भौगोलिक जटिलताका कारण नागरिकले सेवा प्रवाहमा कठिनाइ भोग्दै आएका दुईवटा वडामा सेवा केन्द्र विस्तार गरेको छ ।

गाउँपालिकाले वडा नम्बर २ को आँपटार र वडा नम्बर ६ को पल्लोटारमा सेवा केन्द्र विस्तार गरेको गाउँपालिकाका अध्यक्ष दीपक तिमिल्सेनाले जानकारी दिनुभयो ।

स्थानीय सरकारले प्रदान गर्ने सेवाप्रवाहमा सहज पहुँच पुग्न नसकेका क्षेत्रमा गाउँपालिकाले सेवा केन्द्र थप गरेको उहाँले बताउनुभयो । ‘थप गरिएका सेवा केन्द्रबाट तोकिएको दिनमा वडा कार्यालयबाट उपलब्ध हुने सबै प्रकारका सेवा प्रदान गर्ने व्यवस्था मिलाइएको छ’ अध्यक्ष तिमिल्सेनाले भन्नुभयो– ‘अब सेवाग्राहीले धाएर वडा कार्यालयसम्म पुग्नु पर्दैन ।

घरदैलोमा सेवाप्रवाह पुर्याउँदै नागरिकलाई वास्तविक रूपमा स्थानीय सरकारको भएको अनुभूति गराउने उद्देश्यसहित वडा कार्यालयबाट टाढा रहेका स्थानमा सेवा केन्द्र थप गर्दै लगेको हो । गाउँपालिकाले वडा नम्बर २ मा पशुपति प्रजा प्राविको भवन र वडा नम्बर ६ मा भैरवी कृषि सहकारी संस्थाको भवनबाट सेवा केन्द्र सञ्चालनमा ल्याएको अध्यक्ष तिमिल्सेनाले बताउनुभयो ।

‘टाढासम्म धाएर सेवा लिन जानुपर्ने बाध्यताको अन्त्य गर्दै जाने र जनताको घरदैलोमा सेवा पुर्याउनुपर्छ भन्ने हाम्रो अवधारणा हो, यसले मात्र जनतामा वास्तविक स्थानीय सरकारको अनुभूति गराउँदछ’ उहाँले भन्नुभयो । यी दुई स्थान र आसपासका सेवाग्राहीलाई यसअघि वडा नम्बर २ को ताङलिचोक र वडा नम्बर ६ को भुम्लिचोकमा रहेका वडा कार्यालयबाट सेवा लिन धाएरै जानुपर्ने बाध्यता रहँदै आएको थियो ।