काठमाडौँ । राष्ट्रिय स्वतन्त्र पार्टी (रास्वपा) सुदूरपश्चिम प्रदेश महामन्त्री पारस बाहुनलाई पार्टीले बर्खास्त गरेको छ । बाहुनलाई सुदूरपश्चिम प्रदेश सभापति प्रकाश विष्टले बर्खास्त गर्नुभएको हो । बाहुन गत मंसिर १३ गते महामन्त्रीमा नियुक्त हुनुभएको थियो । 

संगठन र नेतृत्वलाई असहज, असफल बनाउने विविध क्रियाकलाप गरेपछि बर्खास्त गर्नुपरेको प्रदेश सभापति विष्टले जारी गरेको विज्ञप्तीमा भनिएको छ । बाहुनलाई भदौ १० गते स्पष्टीकरण सोधिएको थियो । ७२ घन्टाभित्र स्पष्टीकरण दिन भनिएकामा उहाँले चित्तबुझ्दो जवाफ नदिएकाले बिहीबारदेखि लागू हुने गरी प्रदेश महामन्त्री पदको जिम्मेवारिबाट मुक्त गरिएको प्रदेश सभापति विष्टले बताउनुभएको छ । 

प्रदेश महामन्त्रीबाट बर्खास्त गरिएका बाहुनले भने प्रदेश सभापतिले व्यक्तिगत सम्बन्धलाई लिएर कारबाही गरेको प्रतिक्रिया दिनुभएको छ । नेतृत्वलाई खुसी पार्न नसक्दा महामन्त्रीबाट हटाइएको उहाँको आरोप छ ।