काठमाडौँ । नेकपा एकीकृत समाजवादीले अहिलेका २४ जना पदाधिकारीलाई नै स्थायी कमिटी बनाउने निर्णय गरेको छ । आज केन्द्रीय कमिटी बैठकले वर्तामान पदाधिकारीहरु रहेको स्थायी कमिटी बनाउने निर्णय गरेको हो । 

आजको बैठकले घनेन्द्र बस्नेत, बेदुराम भुसाल र प्रमेश हमाललाई वरिष्ठ नेता मनोनीत गरेको छ । यो मनोनयनसंगै एकीकृत समाजवादीको पदाधिकारी संख्या २४ पुगेको हो ।

दशौं राष्ट्रिय महाधिवेशनबाट अध्यक्ष माधवकुमार नेपाल, सम्मानित नेता झलनाथ खनाल र महासचिव घनश्याम भूसाल चयन हुनुभएको थियो । मंगलबार राजेन्द्र पाण्डे निर्विरोध वरिष्ठ उपाध्यक्ष चयन हुनुभएको थियो । 

बाँकी ६ जना उपाध्यक्ष, चार जना उपमहासचिव र ७ जना सचिव मतदाबाट निर्वाचित हुनुभएको छ । यिनै पदाधिकारी रहेको स्थायी कमिटी हुने बैठकले निर्णय गरेको छ ।

केन्द्रीय सदस्यहरुको मतदानबाट बिहीबार नै ८४ सदस्यीय पोलिट्ब्यूरो गठन भएको छ । १०५ सदस्यीय पोलिटब्यूरोको एकतिहाइ सदस्य स्थायी कमिटी रहने व्यवस्था छ ।