जाजरकोट । रुकुमपश्चिमको आठबीसकोट नगरपालिकाको वडा नम्बर १० स्थित  च्यारीगाउँ खोला नजिक ट्रयाक्टर दुर्घटना हुँदा ५ जनाको मृत्यु भएको छ । दुर्घटनामा ९ जना घाइते भएका छन् ।   

भूकम्पपीडितका लागि अस्थायी टहरा निर्माण गर्न जस्तापाता लिएर आठबीसकोटको वडा नम्बर ८ स्थित घर्तीगाउँ जाँदै गरेकोे रा १ द १४ नम्बरको ट्रयाक्टर बुधबार राति सवा १० बजे दुर्घटना भएको हो । 

दुर्घटनामा  आठबीसकोट–१० नाउलाका ४६ वर्षीय लोकबहादुर शाही, उनकी पत्नी  ४२ वर्षीया चुकीको मृत्यु भएको प्रहरी निरीक्षक नवीन मरासिनीले जानकारी दिनुभएको छ । प्रहरी निरीक्षक मरासिनीका अनुसार  दुर्घटनामा आठबीसकोट–१० स्थित डाँडा भन्ने स्थानका ४८ वर्षीय धनराम सार्की, ५२ वर्षीय भर्दर सार्की र ४७ वर्षीया निर्मला सार्कीको पनि मृत्यु भएको छ । 

 दुर्घटनामा आठबीसकोट–८ का ४१ वर्षीय खड्कबहादुर पुन, आठबीसकोट–१० का ३८ वर्षीय रमेश सार्की, आठबीसकोट–८ का १४ वर्षीय दलबहादुर पुन, ५६ वर्षीय कुमार घर्ती, ३४ वर्षीया रमा गुरुङ, ५१ वर्षीय जगवीर सार्की, ३६ वर्षीय जयबहादुर घर्ती, ५८ वर्षीय मने सार्की र ४२ वर्षीय मदन पुन घाइते भएका छन् । घाइतेको नगर अस्पतालमा उपचार भइरहेको छ । 

ट्रयाक्टर चालक आठबीसकोट–९ का २१ वर्षीय गोपाल विक  फरार रहेको र  उनको खोजी भइरहेको प्रहरीले जनाएको छ ।