काठमाडौँं। राष्ट्रियसभामा २० जना सदस्य चुन्न २ हजार ४७ जनाले मताधिकार प्रयोग गर्न पाउने भएका छन् ।  आउने माघ ११ गते हुने निर्वाचनमा प्रदेश सांसद, गाउँपालिका अध्यक्ष तथा उपाध्यक्ष र नगरपालिकाका प्रमुख तथा उपप्रमुख गरी २ हजार ४७ जनाले मतदान गर्न पाउने निर्वाचन आयोगले जनाएको छ । 

आयोगले उल्लेखित संख्यामा मतदाताको नामावली स्वीकृत भएको छ ।  प्रदेशसभा सदस्य ५ सय ४९ जना छन् । गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख गरी १ हजार ४ सय ९८ जना मतदाता छन् ।   स्वीकृत नामावलीमा प्रदेश सभा सदस्यतर्फको कूल मतदाता ५ सय ५० मध्ये निधन भएका प्रदेशसभा सदस्य १ जनाको नाम हटाइ ५ सय ४९ जना कायम गरिएको आयोगका प्रवक्ता शालिग्राम शर्मा पौडेलले जानकारी दिनुभएको छ । 

प्रवक्ता पौडेलका अनुसार गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखतर्फको कूल मतदाता १ हजार ५०६ जनामध्ये निधन भएका गाउँपालिका अध्यक्ष १, उपाध्यक्ष १, नगरपालिका उपप्रमुख १ र निलम्बनमा परेका गाउँपालिकाका अध्यक्ष १, नगरपालिकाका प्रमुख ४ गरी जना ८ जनाको नाम हटाइ कूल १ हजार ४९८ जनाको नामावली स्वीकृत गरिएको छ ।

फागुन २० गते राष्ट्रियसभाका एक तिहाइ सदस्य (२० जना ) को पदावधि सकिँदैछ । फागुन २० गते नेकपा एमालेका ८, नेपाली कांग्रेसका ४, माओवादी केन्द्रका ३, एकीकृत समाजवादीका २, जनता समाजवादी पार्टीका १ र राष्ट्रपतिद्वारा मनोनित २ जनाको कार्यकाल सकिन लागेको हो । त्यसको लागि माघ ११ गते निर्वाचन गर्न लागिएको हो । 

पदावधि सकिनुभन्दा ३५ दिन अगावै निर्वाचन गर्नुपर्ने कानुनी व्यवस्था भएकाले माघ ११ गते राष्ट्रियसभा सदस्य निर्वाचन हुन लागेको हो ।

राष्ट्रियसभा निर्वाचनका लागि १२ वटा दल दर्ता भएका छन् । नेपाली कांग्रेस, नेकपा एमाले, नेकपा माओवादी केन्द्र, जनता समाजवादी पार्टी, नेकपा एकीकृत समाजवादी, राष्ट्रिय प्रजातन्त्र पार्टी, नागरिक उन्मुक्ति पार्टी, नेपाल मजदुर किसान पार्टी, जनमत पार्टी, राष्ट्रिय जनमोर्चा, लोकतान्त्रिक समाजवादी पार्टी र नेपाल समाजवादी पार्टीले दल दर्ता गरेको निर्वाचन आयोगले जनाएको छ । संसदको चौथो ठूलो दल राष्ट्रिय स्वतन्त्र पार्टी रास्वपाले भने राष्ट्रिय सभा चुनावका लागि दल दर्ता गरेको छैन ।

निर्वाचन कार्यक्रम बमोजिम पुस २० गते निर्वाचन अधिकृतको कार्यालयमा मतदाता नामावली प्रकाशित हुनेछ । प्रकाशित नामावलीमा कुनै मतदाताको नाम छुटेको भए नाम समावेश गर्न, नाम समावेश भएको व्यक्तिको नाम, थर, उमेर, पद आदि विवरण सच्याउनु पर्ने भए सच्याउन र मतदाताको विरोधमा उजुरी दिनुपर्ने भए सम्बन्धित निर्वाचन अधिकृतको कार्यालयमा निवेदन दिन सकिनेछ ।  पुस २२ गते अन्तिम मतदाता नामावली प्रकाशन गरिने आयोगले जनाएको छ ।

राष्ट्रियसभा सदस्य निर्वाचनमा मतभार ५७ हजार ५ सय ५९ छ । प्रदेशसभा सदस्यको मतभार ५३ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार १९ तोकिएको छ । प्रदेशसभा सदस्यको कूल मतभार २९ हजार ९७ र  गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार २८ हजार ४ सय ६२ हुनेछ ।