काठमाडौँ । सत्तारुढ ठूलो दल नेपाली कांग्रेसको महासमिति बैठक फेरि सारिएको छ । यसअघि पुस १६ देखि १९ गतेका तोकिएको महासमिति बैठक फेरि फागुन ७ देखि १० सम्मको लागि धकेलिएको  हो । 

केन्द्रीय कार्यसम्पादन समितिको शुक्रबार बसेको बैठकले महासमिति बैठक फागुन ७ देखि १० सम्म गर्ने निर्णय गरेको छ । माघ ११ गते राष्ट्रियसभा निर्वाचन हुने भएकाले बैठक फेरि सार्नु परेको नेता विमलेन्द्र निधिले बताउनुभयो ।  बैठकले राष्ट्रिय सभा चुनावका लागि निर्वाचन आयोगमा दल दर्ता गराउने र उम्मेद्वारलाई दिने पत्रमा सभापति शेरबहादुर देउवाले हस्ताक्षर गर्ने निर्णय पनि बैठकले गरेको छ । दल दर्ता लगायतका कामका लागि पार्टीका मुख्य सचिव कृष्णप्रसाद पौडेललाई अधिकार दिइएको नेता निधिले जानकारी दिनुभयो ।

कांग्रेसले महासमिति बैठक सारेको यो चौथो पटक हो । यसअघि कांग्रेसले मंसिर १३ गतेदेखि १५ गतेसम्म महासमिति बैठक बस्ने निर्णय गरेको थियो । त्यो बैठक कांग्रेसले दुई साता पछि सारेर मंसिर २९ तथा पुस १ र २ गते गर्ने निर्णय गरेको थियो । त्यसपछि फेरि बैठक सारेर पुस १६ गतेदेखि १९ गतेका लागि तय गरिएको थियो ।

राष्ट्रि सभा निर्वाचन र जाडो मौसमलाई कारण देखाउँदै कांग्रेसले चौथो पटक महासमिति बैठक सारेर फागुन ७ देखि १० सम्म गर्ने निर्णय गरेको हो । कांग्रेसले महासमिति बैठक अघि पुस १२ गतेदेखि  केन्द्रीय समिति बैठक बोलाएको छ ।