हुम्ला ।  हुम्लामा ट्र्याक्टर दुर्घटना हुँदा १ जनाको मृत्यु भएको छ । दुर्घटनामा ३ जना घाइते भएका छन् । 

जिल्लाको दक्षिण भेगमा पर्ने चङ्खेली गाउँपालिकामा आज बिहान ट्र्याक्टर  दुर्घटना भएको हो ।  अनुदानको नुन लिएर चङ्खेली गाउँपालिका–१ दर्बिस्थित बोहरावाडाबाट रिमीतर्फ जाँदै गरेको लु ४ त ७७२० नम्बरको ट्र्याक्टर दुर्घटना भएको  प्रहरी निरीक्षक सुरेश सुवेदीले जानकारी दिनुभएको छ । ट्र्याक्टर सडकबाट करिब ४० मिटर तल खसेको छ ।

प्रहरी निरीक्षक सुरेश सुवेदीका अनुसार दुर्घटनामा त्यही वडाका ३५ वर्षीय तुले बोहराको मृत्यु भएको छ ।  दुर्घटनामा  चङ्खेली–१ का ४० वर्षीय मानबहादुर बोहरा, त्यही वडाका ४५ वर्षीया धना बोहरा, १० वर्षीया चरी बोहरा घाइते भएका छन् ।

मानबहादुरकोको टाउको र छातीमा चोट लागेकाले अवस्था गम्भीर रहेको प्रहरी निरीक्षक सुवेदीले जानकारी दिनुभयो । धनाको टाउको र चरीको शरीरका विभिन्न भागमा चोट लागे पनि उहाँहरूको अवस्था मध्यम रहेको जिल्ला प्रहरीले जनाएको छ ।

प्रहरीका अनुसार ट्र्याक्टर मुगु जिल्ला छायाँनाथ रारा नगरपालिका–१४ का २६ वर्षीय हिराबहादुर बडुवालले चलाएका थिए । चालक बडुवाल दुर्घटनालगत्तै फरार रहेकाले खोजी भइरहेको प्रहरीले जनाएको छ ।