भक्तपुर । मध्यपुरथिमी नगरपालिकाले चालु आर्थिक वर्षको पहिलो छ महिनामा  १४ करोड रुपैयाँ भन्दा बढी राजस्व सङ्कलन गरेको छ । 

 नगरपालिकाले आन्तरिक स्रोतबाट  १४ करोड २८ लाख १९ हजार ६ सय ९० रुपैयाँ सङ्कलन गरेको हो ।

यो पालिकाको कूल वार्षिक राजस्व सङ्कलन लक्ष्यको ३९ दशमलव ३६ प्रतिशत हो । यहाँ चालु आवमा  ३६ करोड २८ लाख ७ हजार रुपैयाँ आन्तरिक स्रोतबाट राजस्व सङ्कलन गर्ने लक्ष्य रहेको छ । 

उपप्रमुख विजयकृष्ण श्रेष्ठले गत आर्थिक वर्षको तुलनामा यस वर्ष नक्सा पास कम भएकाले लक्ष्यअनुसार राजस्व सङ्कलन हुन नसकेको जानकारी दिनुभयो । गत वर्ष यस नगरपालिकाले घर नक्साको अभिलेखीकरण खुलाएको थियो । 

यस वर्ष घर नक्सा पासमा राजस्व सङ्कलनमा कमी आए पनि व्यवसाय, घरबहाल र विज्ञापन कर शीर्षकमा राजस्व वृद्धि भएको उपप्रमुख श्रेष्ठले बताउनुभयो । उहाँका अनुसार व्यवसाय कर, घरबहाल कर र विज्ञापन कर शीर्षकमा गत आवको तुलनामा यस वर्ष. दुई करोड ५२ लाख ८९ हजार आठ सय ८८ रुपैयाँ भन्दाबढी राजस्व सङ्कलन भएको छ । 

नगरपालिकाले चालु आवको पहिलो ६ महिनामा सबैभन्दा धेरै असोजमा ३ करोड ६० लाख ५६ हजार ३७, साउनमा  तीन करोड २७ लाख ८५ हजार चार सय ५२ र भदौमादुई करोड ४३ लाख ५३ हजार चार सय ७३ रुपैयाँ आन्तरिक आम्दानी गरेको थियो ।

यसैगरी कात्तिकमा एक करोड ९८ लाख १२ हजार तीन सय ६६, मङ्सिरमा  दुई करोड आठ लाख १६ हजार एक सय ७४ र पुसमा सबैभन्दा कम ९४ लाख १७ हजार ९ सय ८१ रुपैयाँ राजस्व सङ्कलन गरिएको नगरपालिकाले जनाएको छ ।