काठमाडौँ ।  वरिष्ठ अधिवक्ता दिनेश त्रिपाठीले अदालतमा दुर्व्यवहार गर्नेविरुद्ध जाहेरी दिनुभएको छ । 

स्वर्णलक्ष्मी सहकारीको बचत हिनामिना प्रकरणमा रास्वपा सभापति रवि लामिछानेको थुनछेक बहस सकेर निस्किँदा काठमाडौँ जिल्ला अदालतबाट बाहिर निस्कने क्रममा अधिवक्ता त्रिपाठीमाथि बुधबार दुर्व्र्यवहार भएको थियो ।

अधिवक्ता त्रिपाठीले अदालत परिसरमा दुर्व्यवहार गरेको आरोपमा पक्राउ परेका व्यक्तिविरुद्धप्रहरी कहाँ किटानी जाहेरी दिनुभएको हो ।

जिल्ला प्रहरी परिसर, काठमाडौंका एसपी नवराज अधिकारीका अनुसार, त्रिपाठीले प्रहरीमा दिएको ज्यान मार्ने उद्योग र आपराधिक उपद्रव सम्बन्धी कसुरको जाहेरी दर्ता भएको छ ।  घटना लगत्तै प्रहरीले त्रिपाठीलाई दुर्व्यवहार गरेको आरोपमा ललित केसीलाई पक्राउ गरिसकेको छ ।

अधिवक्ता त्रिपाठीको जाहेरीका आधारमा पक्राउ परेका केसीलाई ७ दिन हिरासतमा राखेर अनुसन्धान गर्न अदालतले अनुमति दिएको छ ।