काठमाडौँ । राष्ट्रपति रामचन्द्र पौडेल र  दक्षिण एशियाली मुलुकका प्रमुख निर्वाचन अधिकारीहरुबीच भेटवार्ता भएको छ । 

राष्ट्रपतिले निर्वाचन निकायको साझा मञ्चको १२ औं सम्मेलनको लागि नेपाल आउनुभएका मञ्चका सदस्य मुलुकका प्रमुख निर्वाचन आयुक्तहरूसँग आज शीतल निवासमा भेटवार्ता गर्नुभएको हो । 

भेटवार्तामा राष्ट्रपति पौडेलले आवधिक निर्वाचन लोकतन्त्रको आधारस्तम्भ भएको बताउँदैराज्यमाथि  जनताको पहुँच र स्वामित्व  यसैबाट स्थापित हुने धारणा व्यक्त गर्नुभयो । उहाँले राज्यमाथि जनताको पहुँच र स्वामित्व स्थापित गर्नका लागि निर्वाचन स्वच्छ निष्पक्ष र धाँधलीरहित हुनुपर्ने पनि बताउनुभयो ।

राष्ट्रपतिले यो सम्मेलनले दक्षिण एशियाका मुलुकमा हुने निर्वाचनलाई व्यवस्थित गर्दै अझ स्वतन्त्र, निष्पक्ष र भयरहित बनाउन सहयोगी सिद्ध होस् भन्ने शुभकामना पनि दिनुभयो ।
उहाँले भन्नुभयो– ‘समग्र  दक्षिण  एशिया क्षेत्रमा  स्वच्छ, पारदर्शीर विश्वसनीय  निर्वाचन प्रणालीको माध्यमद्वारा लोकतन्त्रको प्रवर्द्धन रसुदृढीकरणका लागि यससंस्थामार्फत यहाँहरुको अमूल्य योगदान निरन्तररुपमा रहनेमा म विश्वस्त छु।’ 

राष्ट्रपतिले आगामी दिनमा अध्यक्ष राष्ट्रको हैसियतमा अन्य सदस्य मुलुकहरुसँग यस संस्थाको साझा उद्देश्य प्राप्त गर्न र चुनौतीविरुद्ध सामूहिक रुपमा सामना गर्नका लागि आपसी सहयोग र सहकार्यलाई अझ सुदृद्ध बनाउन नेपाल प्रतिवद्ध रहने पनि स्पष्ट पार्नुभयो ।सो क्रममा प्रमुख निर्वाचन आयुक्त दिनेश थपलियाले दक्षिण एसियाली मुलुकका निर्वाचन निकायहरुको साझा मञ्चको १२ औं सम्मेलनका बारेमा राष्ट्रपतिलाई जानकारी गराउनुभएको शीतलले जनाएको छ ।

त्यस अवसरमा भारत, पाकिस्तान, बङ्गलादेश, मालदिभ्स लगायतका सार्क मुलुकका निर्वाचन कार्यालयका प्रमुख तथा प्रतिनिधिहरूको उपस्थिति थियो ।