काठमाडौँ । काठमाडौँ महानगरपालिकाका मेयर बालेन शाहका समर्थकहरूले फेसबुकमा प्रधानमन्त्री केपी शर्मा ओलीलाई ‘अनफलो’ अभियान चलाएका छन् । मंगलबार अपह्रान्नबाट शुरु गरेको अनफलो अभियानमा बुधबार साँझ सम्ममा करिब ८० हजारले अनफलो गरिसकेका छन् र यो क्रम जारी राखेका छन् ।  

हिजो अपह्रान्न सम्म ६ लाख ६२ हजार फलोअर रहेका प्रधानमन्त्री ओलीको पेजमा बुधबार साँझ सम्ममा फलोअर घटेर ५ लाख ८९ हजार पुगेका छन् । अनफलो अभियान चलेको २४ घण्टामा प्रधानमन्त्री ओलीका फलोअर करिब ८० हजारले घटेका हुन् । 
 
काठमाडौँ महानगरपालिकाका मेयर बालेन शाहले मंगलबार अपराह्न एमाले समर्थकहरुले रिपोर्ट गरेर आफ्नो स्टाटस हटाइदिएको दाबीसहिको स्टाटस पोस्ट गर्नुभएको थियो । उहाँले सरकारकै संलग्नतामा आफ्नो स्टाटस हटाइएको संकेत गर्दै स्टाटस लेख्नुभएको थियो । त्यसपछि बालेनका समर्थहरूले प्रधानमन्त्री ओलीलाई अनफलो गर्न थालेका थिए । 

भदौ १६ गते आइतबार मेयर बालेनले नेकपा (एमाले)की लुम्बिनी प्रदेश सांसद रेखा शर्मामाथि नाबालिकालाई घरेलु कामदार राखेर हिंसा गरेको दाबीसहित फेसबुकमा एउटा पोस्ट गर्नुभएको थियो । 

उक्त पोष्टमा उहाँले काठमाडौँ महानगरले दुई महिनादेखि कारबाही अगाडि बढाउन आग्रह गर्दा पनि सरकारले बेवास्ता गरेको आरोप लगाउनुभएको थियो । सांसद शर्माको विषयमा कुनै कारबाही नभएको बताउँदै मेयर बालेनले प्रधानमन्त्री ओलीमाथि आक्रोश पोख्नुभएको थियो । 

त्यसको बिरोधमा एमाले निकट विद्यार्थी नेताहरूले मेयर बालेनको विरोध गरेका थिए । बिद्यार्थीहरुले बालेनले झुटो दाबीसहित प्रधानमन्त्रीलाई अनावश्यक विवादमा मुछेको भन्दै बालेनको स्टाटसको प्रतिवाद गरेका थिए । 

मंगलबार बालेनको उक्त स्टाटस एकाएक फेसबुकबाट गायब भएको थियो । त्यसपछि बालेनले आफ्नो स्टाटस सरकारकै संलग्नतामा हटाइएकोतर्फ संकेत गर्दै अर्को स्टाटस पोस्ट गर्नुभएको थियो । आफ्नो पोस्ट फेसबुकबाट गायब भएपछि बालेनले लेख्नुभएको थियो–‘पोस्ट उडाउने हैन, दोषी समाऊ सरकार । म गलत हो भने मलाई समाऊ, हैन भने दोषी समाऊ ।’

बालेनको यो पोष्ट पछि प्रधानमन्त्री ओलीलाई फेसबुकमा अनफलो गर्ने क्रम चलिरहेको छ ।