पर्सा । देशकै प्रमुख व्यापारिक नाका वीरगञ्जबाट मोटरसाइकल आयातमा उलेख्य वृद्धि भएको छ । त्यो नाका प्रयोग गरी जीप र कारको आयातमा भने कमी आएको छ । 

गत आर्थिक वर्ष २०८० र ८१ को साउनको तुलनामा चालु आर्थिक वर्षको सोही अवधिमा जीप र कारको आयातमा ४० प्रतिशतले कमी आएको छ । त्यस अवधिमा मोटरसाइकलको आयात शत् प्रतिशतले बढेको छ । 

गत आर्थिक वर्षको साउन महिनामा वीरगञ्ज नाकाबाट  ४६ करोड ७७ लाखका ३ हजार पाँच सय ७१ थान मोटरसाइकल आयात भएको वीरगञ्ज भन्सार कार्यालयका सूचना अधिकारी राघुलाल कर्णले जानकारी दिनुभयो । चालु आवको साउनमा भने ९४ करोड ४८ लाखका सात हजार एक सय ५० थान मोटरसाइकल आयात भएका थिए ।  

वीरगञ्ज भन्सार कार्यालयले उपलब्ध गराएको तथ्याङ्कअनुसार गत आर्थिक वर्षको साउन महिनामा  २० करोड ६० लाखका एक सय २७ थान जीप र कार आयात भएका थिए भने चालु आवको त्यही अवधिमा ् १४ करोड ४४ लाखको ७६ थान मात्र जीप र कार आयात गरिएको छ । 

भारत तथा तेस्रो मुलुकबाट पाटपुर्जा भित्र्याइए नेपालमै पेट्रोलबाट चल्ने मोटरसाइकल एसेम्वल्ड गर्ने आयातकर्तालाई सरकारले राजस्वमा ५० प्रतिशत छुट दिएका कारण आयात वृद्धि भएको सूचना अधिकारी कर्णले बताउनुभयो । 

गत आर्थिक वर्षको साउन महिनामा मोटरसाइकल आयातबाट  ४४ करोड २१ लाख रुपैयाँ राजस्व सङ्कलन भएको थियो । चालु आवको त्यही अवधिमा भने  ८८ करोड ६४ लाख रुपैयाँ राजस्व सङ्कलन भएको कार्यालयले जनाएको छ ।