काठमाडौँ । विभिन्न स्थानीय तहमा रिक्त रहेको जनप्रतिनिधि पूर्ति गर्न सरकारले आउने मंसिरमा उपनिर्वाचन गराउने तयारी गरिरहेको छ । 

सरकारको तयारीसँगै नेपाल कम्युनिष्ट पार्टी (एकीकृत समाजवादी) ले वरिष्ठ उपाध्यक्ष राजेन्द्र पाण्डेको संयोजकत्वमा उपनिर्वाचन परिचालन कमिटी गठन गरेको छ ।

स्थानीय तहमा रिक्त रहेका स्थानमा आगामी मङ्सिरमा हुने उपनिर्वाचनका लागि पार्टीले भूगोललाई केन्द्रित गरेर उपनिर्वाचन परिचालन कमिटी गठन गरेको केन्द्रीय सचिव सोमप्रसाद पाण्डेयले जानकारी दिनुभएको छ । सचिव पाण्डेयका अनुसार  आसन्न उपनिर्वाचन लक्षित कमिटीमा पार्टीका उपाध्यक्ष, उपमहासचिव र सचिव लगायतलाई राखिएको छ । 

कोशी प्रदेशको संयोजकमा उपाध्यक्ष जगन्नाथ खतिवडा, मधेसको संयोजकमा धर्मनाथप्रसाद साह, बागमतीको संयोजकमा डा गङ्गालाल लुलाधर, गण्डकीको संयोजकमा पार्टी सचिव श्रीनाथ बराल, लुम्बिनीको संयोजकमा उपमहासचिव मेटमणि चौधरी, कर्णालीको संयोजकमा पार्टी उपाध्यक्ष प्रकाश ज्वाला र सुदूरपश्चिम प्रदेशको संयोजकमा भानुभक्त जोशीलाई जिम्मेवारी तोकिएको छ । 

 पार्टीका विभिन्न विभाग, इन्चार्जसहितका विभिन्न नेतालाई जिम्मेवारी छिट्टै तोकिने जनाइएको छ ।