बाँके । बाँकेमा झाडापखालाबाट ४ जनाको मृत्यु भएको छ । झाडापखालाले ७ जना बिरामी परेका छन् । 

नरैनापुर गाउँपालिका–३ गेगली गाउँमा फैलिएको झाडापखालाबाट ४ जनाले जीवन गुमाएका हुन् । झाडापखालाबाट गेगलका २५ वर्षीय रुसा पासी र उहाँकी डेढ वर्षकी छोरी नन्दनी पासी, ६० वर्षीया शान्ति पासी र १० वर्षीय युसुफ अलीको मृत्यु भएको नरैनापुर–३ का वडाध्यक्ष अजय मिश्राले जानकारी दिनुभएको छ । वडाध्यक्ष  मिश्राका अनुसार उनीहरुको आइतबार मृत्यु भएको हो । 

भारतीय सीमासँग जोडिएको गाउँ गेगलीमा झाडापखाला फैलिएको नरैनापुर गाउँपालिकाका स्वास्थ्य शाखा प्रमुख नगेन्द्रकुमार साहले जानकारी दिनुभएको छ । उहाँले भन्नुभयो– ‘आफूसहित अन्य स्वास्थ्यकर्मीको टोलीले गाउँमै पुगेर बिरामीको उपचार गरिरहेका छौँ ।’  

गर्मी र खानेपानी दूषित भएका कारण झाडापखाला फैलिएको हुनसक्ने स्वास्थ्यकर्मीको भनाइ छ । झाडापखाला नियन्त्रण गर्न स्वास्थ्य कार्यालय बाँकेसँग समेत समन्वय भएको छ ।