काठमाडौँ । न्याय परिषद्ले गैरसंवैधानिक रुपमा न्यायाधीशहरुको नियुक्ति गर्न लागेको भन्दै नेपाल बार एशोसिएसनले न्याय परिषद् सचिवालयमा धर्ना दिएको छ ।

न्याय परिषद्ले गैरसंवैधानिक रुपमा न्यायपरिषद् नियमावली संशोधन गरेर विगत एक वर्षदेखि सोही नियमावलीमार्फत् न्यायाधीश नियुक्त गरिरहेको भन्दै बारले आपत्ति जनाएको हो ।

सञ्चारकर्मीहरुसँग कुराकानी गर्दै बारका अध्यक्ष गोपालकृष्ण घिमिरेले न्याय परिषद्ले नियमावली संशोधन गरी न्यायाधीशहरुलाई दुईवटा वर्गमा विभाजन गरेको बताउनुभयो । ‘न्याय परिषद्ले एक वर्षदेखि गैरसंवैधानिक रुपमा संशोधन गरेको न्याय परिषद् नियमावलीमार्फत न्यायाधीशहरुको नियुक्ति गरिराखेको अवस्था छ । त्यसरी गैरसंवैधानिक रुपमा न्यायाधीश नियुक्ति गर्न मिल्दैन भन्ने हाम्रो स्पष्ट अडान हो । 

त्यो कुरा हामीले शान्तिपूर्ण रुपमा राख्यौँ । तर आजसम्म न्याय परिषद्का अध्यक्ष प्रधानन्यायाधीश, न्याय परिषद्का सदस्यहरु कसैले पनि यो कुरालाई सुन्न तदारुकता देखाउनुभएको छैन । त्यस कारणले नेपाल बार एसोसिएसन आज यो कदम चाल्न बाध्य भएको छ । न्याय परिषद् घेराउको अभियानमा छौँ । न्याय परिषद्को यो गैर संवैधानिक काम तत्काल रोकियोस्, अध्यक्ष घिमिरेले भन्नुभयो  ।

यो बिषयमा पटक-पटक ध्यानाकर्षण गराउँदा पनि न्याय परिषद्ले नसुनेकाले बाध्य भएर आन्दोलनमा उत्रिनु परेको उहाँले बताउनुभयो ।