काठमाडौँ । नेपाली विद्यार्थी २१ वर्षीया मुना पाण्डेको हत्याका अभियोगमा अमेरिकाको टेक्सास राज्यबाट प्रहरीले ५१ वर्षीय बवी सिंह शाहलाई पक्राउ गरेको छ । मृतक पाण्डे बस्ने अपार्टमेन्टको ढोका नजिकैको क्लोज सर्किट क्यामरामा क्याप्चर भएको फुटेज र अडियो अनुसार शनिबार साँझ ८ः४० बजे शाह पाण्डेको ढोकामा पुगेको देखिन्छ ।

फुटेजमा देखिए अनुसार शाहले दाहिने हातमा पेस्तोल बोकेका थिए । उनले पटकपटक ढोका खोल्नलाई ढोका ढकढक पारेका थिए । ढोका भित्रैबाट पाण्डेले ‘ह्वाट आर यू गोइङ टु डु (के गर्न लागेको) ?’ भन्दै प्रश्न गरेको आवाज  सीसी टीभीको अडियोमा क्याप्चर भएको छ । 

अनुसन्धान अधिकृतहरुलाई उधृत गर्दै अमेरिकी संचारमाध्यमले लेखे अनुसार, शाहले पटक पटक ढकढक गर्दै ‘ओपन द डोर’ (ढोका खोल) भनेपछि २१ वर्षीया पाण्डेले ढोका खोलेको फुटेजमा देखिन्छ । उनले ढोका खोल्ने बित्तिकै शाहले उनलाई भित्र धकेलेका थिए र ढोका बन्द गरेका थिए । त्यसको करिब एक घण्टापछि शाह अपार्टमेन्टबाट निस्किएको भिडियोमा देख्न सकिन्छ । 

पाण्डेको  टेक्सासको हयुष्टनमा गत शनिबार हत्या भएको थियो । उनलाई गोली हानी हत्या गरेको अभियोगमा पक्राउ परेका बबि सिंह शाहलाई प्रहरीले अदालतमा उपस्थित गराएको छ । अदालतले उनको संलग्नता देखिने आधार रहेको भन्दै जमानतमा छाड्न अस्वीकार गरेको छ । अर्को सुनुवाइ मंगलबार अमेरिकी समयअनुसार बिहान ९ बजे हुँदैछ ।