काठमाडौँ । सत्तारुढ दल नेकपा एकीकृत समाजवादीका डोल्पाका उपाध्यक्ष मानबहादुर बूढा काठमाडौँमा कुटिएका छन् । 

समाजवादीका डोल्पा उपाध्यक्ष बूढालाई जीवन तिरुवा लगायतका युवा जत्थाले ‘लेनदेन कारोबार नमिलाएको’ भन्दै मंगलबार दिउँसो अनामनगरको ‘हिलीहाङ ग्रीन टी’ छेउमा लछारपछार पार्दै कुटेका हुन् ।  माओवादीको भातृसंगठनअखिल क्रान्तिकारीका नेता तिरुवा बौद्ध बहुमुखी क्याम्पस, काठमाडौँका स्ववियु पदाधिकारी हुन् ।  एकीकृत समाजवादीका युवा नेता बूढालाई ५, ७ जनाको युवा जत्थाले मुक्कैमुक्काले मुखमा हानेका थिए  । बूढालाई उनीहरुले समाएर घिर्सार्दै लात्तीले जीउमा समेत हिर्काएका थिए । युवा जत्थाको कुटपिटबाट उपाध्यक्ष बूढाको अनुहारमा चोट लागेको छ । उपाध्यक्ष बूढालाई युवा जत्थाले निर्घात कुटपिट गरेपछि घटनास्थल वरपरका स्थानीयले प्रहरीलाई खबर गरे । प्रहरीले त्यसपछि दुवै पक्षलाई नियन्त्रणमा लिएको छ । 

युवा जत्थाले एकीकृत समाजवादीका जिल्ला उपाध्यक्ष बूढालाई कुट्ने क्रममा लमजुङका प्रदीप सिलवालको हेलमेटको सीसा (भाइजर) फुटेको छ । कुटपिट गर्ने समूहले सिलवाललाई त्यसको क्षतिपूर्ति समेत दिएका छन् । हेलमेटको सीसा फुटाएपछि कुटपिट गर्नेहरुलाई आफूले तत्कालै ६ सय रुपैयाँ तिराएको सिलवालले बताउनुभएको छ ।